27-noyabr, chorshanba kuni elektr energiyasi bilan bog‘liq muammo tufayli Toshkent metrosining “O‘zbekiston” yo‘nalishidagi “G‘afur G‘ulom”, “Alisher Navoiy” va “O‘zbekiston” bekatlarida yoritish uskunalarida nosozlik kuzatilgan edi.
“Hududiy elektr tarmoqlari” AJ matbuot xizmati Toshkent metrosidagi elektr ta’minoti muammosi sabablarini “Daryo”ga ma’lum qildi.
Ma’lum bo‘lishicha, bugun soat 10:42 da Shayxontohur tumanida joylashgan 35 kV “Shayxontohur” podstansiyadagi yuqori kuchlanishli “Shayxontohur 1” yo‘nalishli kabel tarmog‘i shikastlanishi natijasida qisqa muddatli uzilish bo‘lgan hamda shu zahoti avtomatik ravishda zaxiradagi kabel tarmog‘iga ulangan. Soat 10:43 da elektr energiyasi to‘la quvvat bilan uzatila boshlangan.
Avvalroq “Toshkent metropoliteni” matbuot xizmati holat haqida xabar berib, elektr ta’minotidagi muammo bartaraf etilganini, bu holat poyezdlar harakatiga ta’sir etmaganini ma’lum qilgandi.
Izoh (0)