Telegram’dagi “SizdanTelegram” kanali orqali 26-noyabr, seshanba kuni Farg‘ona viloyati Rishton tumani “Yoyilma” mahalla fuqarolar yig‘inida 23-noyabr kuni mahallalar o‘rtasida ommaviy mushtlashuv ro‘y bergani haqida xabar tarqatilgan. Farg‘ona viloyati IIB mazkur xabarni rad etdi va holat bo‘yicha ma’lumot berdi.
Ma’lum qilinishicha, ushbu holat yuzasidan Farg‘ona viloyati IIB Jinoyat-qidiruv bo‘limi va Rishton tumani IIB xodimlari tomonidan tezkor surishtiruv olib borilgan. Surishtuv ishlari davomida Rishton tumani “Yoyilma” mahalla fuqarolar yig‘ini raisi Ahmadali Yigitov mazkur holatga izoh berib, o‘sha kuni “Yoyilma” mahalla fuqarolar yig‘ini hududidagi 6 ta xonadonda to‘y bo‘lib o‘tganligini, ammo to‘ylarda hech qanday janjal bo‘lmaganligini ta’kidladi.
Qayd etilishcha, raisning bu ko‘rsatmasini MFY ma’sul kotibi Mavluda G‘opirova, mutaxassis Gulsanam Mamatova va profilatika inspektori yordamchisi Nursulton Dushaboyev ham tasdiqlagan.
To‘y marosimi o‘tkazgan fuqarolar bilan o‘tkazilgan suhbat va surishtiruvda ham shu kuni mahallada hech qanday janjal bo‘lmagani ma’lum bo‘ldi, deyiladi IIB xabarida.
Viloyat IIB mazkur ma’lumotlardan kelib chiqib, Telegram’dagi kanalda tarqatilgan xabarning asossiz ekanligini ta’kidlagan. Shuningdek, “Yoyilma” MFY tarkibida faqat bitta Yoyilma qishlog‘i mavjudligi, boshqa hech qanday qo‘shimcha mahalla yoki qishloqlar mavjud emasligi qo‘shimcha qilingan.
Hozirda yuqoridagi xabar yuzasidan qo‘shimcha surishtiruv ishlari olib borilmoqda.
Izoh (0)