Газ (ва электр) таъминотидаги узилишлар сабаб Қорақалпоғистоннинг Нукус туманида ва Сирдарё вилоятининг Бахт шаҳрида одамлар йўлларга чиқди. Нукус туманидаги норозиликлар «Қирантау» овул фуқаролар йиғинига кирувчи Шўртанбай овулига табиий газ етиб бормаётгани оқибатида келиб чиққан — айнан шу тўполонлардан сўнг раҳбарият қишлоққа газ тортиш, ҳеч бўлмаса ҳудуддаги мактаб, боғча ва шифохоналарни газга улаш ҳақида ўйлай бошлаган. Бахтда эса кечадан бери газ-заправка очилишини кутиб турган ҳайдовчилар ўзини «Ўзбекнефтгаз», «Ўзтрансгаз» ходими деб, заправканинг газ ҳисоблаш мосламасини олиб, заправкани «ўчириб кетгач», «Тошкент—Гулистон» йўлини тўсиб қўйган.
Электр таъминотидаги узилишлар Тошкент метроси ва жонли эфирларгача етиб борди. 27 ноябрь куни соат 10:42 да Шайхонтоҳур туманида жойлашган подстанцияда кабел тармоғи шикастланиши натижасида метронинг «Ғафур Ғулом», «Алишер Навоий» ва «Ўзбекистон» бекатларида қисқа муддатли узилиш юз берган. Шунга ўхшаш узилиш сабаб жонли эфирда кетаётган сайлов дебати узилиб қолган. Тошкентда шундай муҳим жойларда «свет» ўчаётганида, вилоятлар ҳақида нима ҳам дейиш мумкин?
Бош прокуратура Жаҳонгир Ортиқхўжаев билан боғлиқ аудиоёзув бўйича текширув натижаларини эълон қилди. Биринчидан, прокуратура маълумотларига кўра, «Kun.uz» ходимларига ташланган Олмазор тумани ҳокими собиқ ўринбосари Абдурасул Ваҳобов хос учрашув вақтида журналистлардан узр сўраган. Иккинчидан, прокуратуранинг фикрича, «Kun.uz» ходими Баҳодир Аҳмедов ҳоким Ортиқхўжаев билан хос суҳбатни Ўзбекистон қонунчилигига зид равишда хуфёна ёзиб олган. Учинчидан, Бош прокуратура ҳоким Ортиқхўжаев амалдорларнинг одоб-ахлоқ қоидаларини бузган ва бунинг учун ҳукумат томонидан интизомий жавобгарликка тортилиши керак.
Самарқандда собиқ ўқитувчи 15 киши томонидан дўппосланиб ўлдирилди. Воқеа 20 ноябрга ўтар кечаси юз берган. Низолашувчи томонларни дастлаб милиция ходимлари ажратиб қўйган. Лекин иш шу билан тинчимаган — аламзада томон жабрланувчини бир ўзини тутиб олиб, ўласи қилиб дўппослаган. Марҳум бир соат чамаси чалажон ҳолда кўчада қолиб кетган (ва кўрсатилган тиббий ёрдамга қарамай, 23 ноябрь куни вафот этган). Бош прокуратура ахборотига кўра, ҳодиса юзасидан уч киши ҳибсга олинган. «Ўқитувчисининг собиғи бўладими? Нима иш қилаётган экан ўзи?», деб сўрасангиз... яқинда ўқитувчиликни ташлаб, сомса пишириб сотишни бошлаган экан.
Ўзбекистон маданият вазири Бахтиёр Сайфуллаев авжига чиқди. Биринчидан, «Ўзбекконцерт»да хонандаларнинг лицензиясини қайтариб олиш ҳуқуқи йўқлигини маълум қилди. Иккинчидан, яқинда ЙТҲ оқибатида ҳалок бўлган актриса Гавҳар Шариповани «руҳан носоғлом бўлган» деб атади. Учинчидан, хонанда Лоланинг «Севгингни менга айт 2» клипи унга ёқмаганини тан олди. Ушбу фикрлар давомига «Ўзбекконцерт» раҳбари қўшимча қилиб, Лоланинг 2018 йил августидан бери лицензиясиз эканини эълон қилди — қаранг, лицензиясиз ҳам хонанда бўлиб ишласа бўларкан.
Ўқишни қатъий тавсия қиламиз: 73 кун яшаган Туркистон мухторияти. У нега ағдариб ташланди?
Изоҳ (0)