Bugungi kunda O‘zbekistonda tez yordam tizimida ikki yarim mingga yaqin Nissan, Hyundai, Toyota, rusumli va boshqa zamonaviy tez yordam mashinalari aholiga xizmat ko‘rsatmoqda.
Sog‘liqni saqlash vazirligi matbuot xizmatining xabar berishicha, ayni paytda tez yordam avtoparkini yanada zamonaviylashtirish ishlari tizimli davom etmoqda.
2021-yilgacha Damas avtomashinalaridan to‘liq voz kechilib, xalqaro andazalar darajasida jihozlangan zamonaviy tibbiy yordam mashinalariga o‘tiladi. 2019-yil yakuniga qadar barcha tez yordam mashinalarida qulay aloqani, chaqiriqlar uchun mashinani tezkor yo‘naltirishni ta’minlovchi GPS tizimini to‘liq yo‘lga qo‘yish belgilangan.
2016-yilda chaqiriqlar soni 7,2 millionni tashkil qilgan bo‘lsa, joriy yilning o‘tgan davrida esa murojaatlar soni to‘qqiz milliondan oshgan.
Shu bilan birga, shoshilinch tibbiy yordam xizmatining statsionar muassasalariga ham murojaatlar ko‘paymoqda. Jumladan, 2017—2019-yillarda ushbu shifo maskanlariga 7,5 milliondan ziyod bemor murojaat qilgan. Ulardan 2,5 million nafari statsionar, 5 milliondan ortig‘i esa ambulator tibbiy yordamdan bahramand bo‘lgan. Statsionarda davolangan bemorlarning 500 mingdan ortig‘iga yuqori texnologiyali jarrohlik amaliyotlari bajarilgan.
Noyabr oyi boshida tez yordam Damas’lari o‘rniga Ford mashinalari qo‘yilishi ma’lum bo‘lgan edi. Keyinroq 11,9 million dollar qiymatidagi “Toshkent shahrida tez tibbiy yordam xizmati faoliyatiga zamonaviy axborot-kommunikatsiya texnologiyalarini joriy etish” loyihasi doirasida Xitoyning Henan Costar Group kompaniyasi tomonidan zamonaviy axborot kommunikatsiya texnologiyalari va tibbiy asbob-uskunalar bilan jihozlangan 150 ta Ford rusumli tez tibbiy yordam reanimobili O‘zbekistonga yetkazib berilishi haqida xabar berilgan edi.
Izoh (0)