Prezidentning 2018-yil 28-iyundagi “O‘zbekiston Respublikasi Mudofaa vazirligi harbiy qismlarida davlat va xo‘jalik boshqaruvi, mahalliy davlat hokimiyati organlari va boshqa davlat tashkilotlari rahbarlari tarkibi bilan yig‘inlar o‘tkazish to‘g‘risida”gi qarori, shuningdek, 2019-yil 15-noyabrdagi farmoyishiga asosan noyabr va dekabr oylarida ikki bosqichli yig‘in o‘tkazilishi rejalashtirilgan. Bu haqda “Daryo”ga Mudofaa vazirligi matbuot xizmati xabar bermoqda.
Shu munosabat bilan “Chirchiq” poligoni bazasida tashkil etilgan yig‘inning birinchi bosqichida davlat boshqaruvi organlari, xo‘jalik birlashmalari va boshqa tashkilotlar rahbarlari tarkibi saf tortdi.
Yig‘inning ochilish marosimida O‘zbekiston mudofaa vaziri general-mayor Bahodir Qurbonov so‘z olib, o‘tgan yilgi vazirlik va idoralar rahbarlari bilan tashkil etilgan yig‘in yuqori saviyada o‘tkazilgani, pirovardida o‘tgan vaqt mobaynida hamkorlikda samarali ish olib borilgani xususida so‘zlarkan, joriy yilgi yig‘in mashg‘ulotlari davomida ham ko‘zlangan umummanfaatlarga erishilishiga ishonch bildirdi, bu yo‘lda yig‘in ishtirokchilariga muvaffaqiyat tiladi.
Shundan so‘ng yig‘in mashg‘ulotlari qatnashchilari kun tartibiga binoan milliy armiyadagi eng zamonaviy harbiy texnika va qurol-yarog‘lar bilan tanishdi.
Mazkur yig‘in davomida mansabdor shaxslar uch kun mobaynida belgilangan reja bo‘yicha harbiy sohadagi bilim va ko‘nikmalarini oshiradi.
Yig‘in mashg‘ulotlarini yuksak saviyada o‘tkazish uchun “Chirchiq” poligoni bazasida barcha shart-sharoitlar muhayyo etilgan.
Ushbu yig‘in mashg‘ulotlari 30-noyabrga qadar davom etadi.
Izoh (0)