Afg‘oniston prezidenti Muhammad Ashraf G‘ani 19-noyabr kuni mamlakatning IShID terrorchilik tashkilotiga qarshi kurashda mutlaq g‘alabaga erishganini ma’lum qildi. Bu haqda “Afghanistan.ru” xabar berdi.
“Biz IShID faoliyatiga barham berdik”, — deya ta’kidlagan Muhammad Ashraf G‘ani mamlakat sharqida joylashgan Nangarxar viloyatidagi uchrashuvda.
Afg‘oniston davlat rahbari xavfsizlik kuchlari va ichki ishlar idoralari xodimlariga ektremistik tashkilotlarga qarshi kurash harakatlari uchun minnatdorlik izhor qilgan. Shuningdek, u Nangarxarda IShIDning mag‘lub etilgani nafaqat Afg‘oniston balki butun mintaqa uchun ulkan muvaffaqiyat ekanligini bildirdi.
Muhammad Ashraf G‘ani o‘tgan haftada 900 nafar IShID terrorchisi va ularning oila a’zolari Afg‘oniston xavfsizlik kuchlariga taslim bo‘lgani, ular orasida Pokiston, Tojikiston, O‘zbekiston, Qozog‘iston, Eron va boshqa xorij davlatlarining fuqarolari borligiga munosabat bildirib, ushbu mamlakatlar Afg‘onistonda IShID tomonida jang qilgan fuqarolar uchun mas’uliyatni o‘z zimmasiga olishi lozim ekanligini qayd etdi.
Mavzuga doir: Kobulda Afg‘oniston IIV binosi yonida portlash yuz berdi
U viloyat aholisini taslim bo‘lgan IShID terrorchilarining keyingi taqdiri borasida o‘z takliflarini berishga chaqirdi.
Avval Afg‘oniston ichki ishlar vaziri vazifasini bajaruvchi Masud Andrabiy mamlakat janubida joylashgan Nangarxar viloyatidagi politsiya boshqarmasi yangi rahbari tanishtiruvida IShID jangarilari mag‘lubiyatga uchragani va Afg‘onistonda butunlay tor-mor etilganini ma’lum qilgan. Keyinchalik Afg‘oniston mudofaa vazirligi 600 dan ortiq IShID terrorchisining, Nagarxorda esa terrorchilik tashkilotining yana 300 nafar a’zosi hibsga olingani e’lon qilingan. Natijada taslim bo‘lganlarning soni ularning asosiy qismi terrorchilar emas, balki ularning oila a’zolari ya’ni ayollar hamda bolalar ekani oydinlashgan.
AQSh IShIDni qo‘llab-quvvatlagan Nejaat Social Welfare Organization tashkilotiga nisbatan sanksiyalar qo‘llagan. AQSh moliya vazirligi hisobotiga ko‘ra ushbu tashkilot xayriya niqobi ostida terrorchilarga moliyaviy ko‘mak bergan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)