Афғонистон президенти Муҳаммад Ашраф Ғани 19 ноябрь куни мамлакатнинг ИШИД террорчилик ташкилотига қарши курашда мутлақ ғалабага эришганини маълум қилди. Бу ҳақда «Afghanistan.ru» хабар берди.
«Биз ИШИД фаолиятига барҳам бердик», — дея таъкидлаган Муҳаммад Ашраф Ғани мамлакат шарқида жойлашган Нангархар вилоятидаги учрашувда.
Афғонистон давлат раҳбари хавфсизлик кучлари ва ички ишлар идоралари ходимларига эктремистик ташкилотларга қарши кураш ҳаракатлари учун миннатдорлик изҳор қилган. Шунингдек, у Нангархарда ИШИДнинг мағлуб этилгани нафақат Афғонистон балки бутун минтақа учун улкан муваффақият эканлигини билдирди.
Муҳаммад Ашраф Ғани ўтган ҳафтада 900 нафар ИШИД террорчиси ва уларнинг оила аъзолари Афғонистон хавфсизлик кучларига таслим бўлгани, улар орасида Покистон, Тожикистон, Ўзбекистон, Қозоғистон, Эрон ва бошқа хориж давлатларининг фуқаролари борлигига муносабат билдириб, ушбу мамлакатлар Афғонистонда ИШИД томонида жанг қилган фуқаролар учун масъулиятни ўз зиммасига олиши лозим эканлигини қайд этди.
Мавзуга доир: Кобулда Афғонистон ИИВ биноси ёнида портлаш юз берди
У вилоят аҳолисини таслим бўлган ИШИД террорчиларининг кейинги тақдири борасида ўз таклифларини беришга чақирди.
Аввал Афғонистон ички ишлар вазири вазифасини бажарувчи Масуд Андрабий мамлакат жанубида жойлашган Нангархар вилоятидаги полиция бошқармаси янги раҳбари таништирувида ИШИД жангарилари мағлубиятга учрагани ва Афғонистонда бутунлай тор-мор этилганини маълум қилган. Кейинчалик Афғонистон мудофаа вазирлиги 600 дан ортиқ ИШИД террорчисининг, Нагархорда эса террорчилик ташкилотининг яна 300 нафар аъзоси ҳибсга олингани эълон қилинган. Натижада таслим бўлганларнинг сони уларнинг асосий қисми террорчилар эмас, балки уларнинг оила аъзолари яъни аёллар ҳамда болалар экани ойдинлашган.
АҚШ ИШИДни қўллаб-қувватлаган Nejaat Social Welfare Organization ташкилотига нисбатан санкциялар қўллаган. АҚШ молия вазирлиги ҳисоботига кўра ушбу ташкилот хайрия ниқоби остида террорчиларга молиявий кўмак берган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)