AQSh Senati Gonkongdagi vaziyat bo‘yicha qonun loyihasini ishlab chiqdi. Gonkong hukumati Amerikadan ichki siyosatga aralashmaslikni so‘ramoqda

“Gonkongda inson huquqlari va demokratiya to‘g‘risidagi” qonun loyihasi AQSh Kongressi tomonidan bir ovozdan ma’qullandi. Bu haqda “Interfaks” xabar berdi.

Hujjat avval ushbu loyihaga aynan o‘xshash hujjatni ma’qullagan vakillar palatasiga yuborilgan. Kongressning ikkala palatasi qonun loyihasini ma’qullasa, AQSh prezidenti Donald Trampning imzosidan keyin hujjat rasman tasdiqlanadi.

Birinchi qonun loyihasidan keyin Gonkong politsiyasi uchun qurollar, ko‘zni yoshlantiradigan va achishtiradigan gaz, rezina o‘qlar hamda elektroshokerlar yetkazib berishni taqiqlash haqidagi hujjat loyihasi ham muhokamaga qo‘yildi.

Xitoy bilan savdo kelishuvini imzolashga urinayotgan Tramp ushbu qonunni imzolashdan bosh tortishi ham mumkin.

Senat ishlab chiqqan qonun loyihasiga ko‘ra, AQSh davlat kotibi Mayk Pompeo yilda kamida bir marta Kongressga Gonkongning Qo‘shma Shtatlar bilan savdoda imtiyozlarga ega bo‘lish uchun yetarli darajada avtonomiyaga ega ekanligi haqida ma’lumot berib borishi lozim. Hujjatda Gonkongda inson huquqlarining poymol bo‘lishiga sabab bo‘lgan mansabdor shaxslarga nisbatan sanksiyalar qo‘llash ham ko‘zda tutilgan.

Senatdagi demokratlar yetakchisi Chak Shumer hujjat loyihasi ikki palata tomonidan ko‘rib chiqilayotgan vaqtda Xitoy Xalq Respublikasi raisi Si Szinpinga murojaat yo‘llangani va unda Gonkongda, Xitoy shimoli-g‘arbida bo‘layotgan voqealar e’tibordan chetda emasligini ma’lum qildi.

“Agar Gonkongda norozilik bildirayotgan odamlarga nisbatan zo‘ravonlik davom etsa, siz buyuk yetakchi va Xitoy buyuk davlat bo‘la olmaydi”, — deyilgan murojaatda.

Gonkong mahalliy hukumati AQSh Senati va Kongressi tomonidan “Gonkongda inson huquqlari va demokratiya to‘g‘risidagi” qonun loyihasi ishlab chiqilganidan afsusda ekanini bildirdi va ushbu harakat ikki tomonlama munosabatlar hamda amerikaliklarning biznes manfaatlariga putur yetkazishini ma’lum qilgan. Bu kabi hujjatlar ortiqcha va bunga yo‘l qo‘yib bo‘lmaydi, deyiladi Gonkong hukumatining bayonotida.

“AQShning iqtisodiyot va savdo siyosatidagi har qanday bir tomonlama harakat ikki tomon munosabatlariga salbiy ta’sir ko‘rsatadi, amerikaliklarning manfaatiga putur yetkazadi” – deyilgan Gonkong mahalliy hukumatining AQSh harakatiga bildirgan munosabatida. Shuningdek, hukumat megapolisda AQShning 85 ming nafar fuqaro va biznesmenlari hayot kechirayotgani, 1344 ta Amerika kompaniyasi faoliyat yuritayotgani, 278 ta AQSh kompaniyasi Gonkongda hududiy shtab-kvartiralarga ega ekanini qayd etgan.

“Xorijning hech bir qonunchilik organi Gonkongning ichki siyosatiga aralashmasligi lozim. Fuqarolarning xavfsizligini ta’minlash maxsus administrativ hudud hukumatining konstitutsion majburiyatlariga kiradi. Iyun boshidan buyon Gonkongda 700 dan ortiq ommaviy norozilik namoyishlari va boshqa ommaviy tadbirlar o‘tkazildi. Yakunda ushbu harakatlar zo‘ravonlik va qonun buzilishi holatlarini keltirib chiqardi. Jamoat tartibni saqlash bevosita politsiyaning vazifasi hisoblanadi”, — deya ta’kidlangan mahalliy hukumat bayonotida.

Politexnika universiteti Gonkongdagi norozilik namoyishlari markaziy nuqtasiga aylangan. Politsiya ushbu oliygoh hududida 400 nafarga yaqin fuqaroni hibsga olgan. 14-noyabrdan Gonkongdagi boshlang‘ich va o‘rta maktablar yopildi.

Gonkongdagi norozilik namoyishlari iyundan beri davom etmoqda. Noroziliklarga mahalliy hukumatning ekstraditsiya qilish haqidagi qonunni imzolashga qaror qilgani sabab bo‘lgan.

Noroziliklar sabab avvaliga qonunni qabul qilish kechiktirilgan, keyinchalik loyiha ham butunlay bekor qilingan. Biroq politsiya va olomon o‘rtasidagi to‘qnashuvlarga ulanib ketgan noroziliklar hali ham to‘xtagani yo‘q, xalq mahalliy boshqaruv organi rahbarini saylov yo‘li bilan tayinlashni talab qilmoqda.