Yaman isyonchi xusiylari 18-noyabr kuni garovga olgan uchta kemani qo‘yib yubordi. Bu haqda Janubiy Koreya TIV ma’lum qilgan. Kemalardan birining bortida 16 nafar dengizchi, jumladan, ikki nafar Janubiy Koreya fuqarosi ham bo‘lgan, deb yozmoqda “Kommersant”.
Barcha dengizchilar asirga olinganidan 45 soat o‘tgach ozod qilingan. Ular talafot ko‘rmagan va hozir xavfsiz hududda, deyiladi Janubiy Koreya TIV axborotida.
Dengiz transportlari asirga tushganidan keyin Yamandagi Salif portiga olib ketilgan. Saudiya Arabistoni boshqaruvidagi koalitsiya xusiylarning Janubiy Koreya burg‘ulash moslamasini tortuvchi kemani egallab olganini ma’lum qilgan.
Saudi Aramco neft zavodlariga hujum haqida
Sentabrda Saudiya Arabistonidagi Saudi Aramco neft zavodlariga hujum uyushtirilishi natijasida mamlakatda neftni ishlab chiqarish ikki baravarga qisqargan. Dronlar hujumi bo‘yicha mas’uliyatni Yamandagi xusiy jangarilari o‘z zimmasiga olgan, keyinroq AQSh hamda Saudiya Arabistoni ushbu hujumlar ortida Eron turganini bildirgan.
11-oktabrda Qizil dengizda Saudiya Arabistonining Jidda portiga yaqin hududda Eron neft tankeriga hujum uyushtirilgan va kemadagi neftning muayyan miqdori suvga oqqan. Tehron ushbu hujum ortida AQSh, Isroil va Saudiya Arabistoni turganini bildirgan.
Izoh (0)