AQSh milliy xavfsizlik kengashi podpolkovnigi Aleksandr Vindmanga Ukraina mudofaa vaziri bo‘lish taklif qilingan. Bu haqda harbiyning o‘zi AQSh vakillar palatasi eshituvlari vaqtida ma’lum qilgan, deya xabar berdi Axios.
Vindmanning so‘zlariga ko‘ra, Ukraina milliy xavfsizlik kengashi sobiq kotibi Aleksandr Danukyuk 2019-yilning o‘zida unga uch marta mudofaa vaziri lavozimini egallashni taklif qilgan. Podpolkovnik har safar ushbu takliflarni rad etgan va o‘z rahbariyatini bu haqda xabardor qilgan.
“Bu kulgili holat. AQSh armiyasi podpolkovnigi uchun bunday yuqori martabali lavozimning taklif etilishi g‘aroyib hodisa. Danilyukning taklifi jiddiy bo‘lganligiga shubham bor”, — deydi Vindman.
Ukraina Milliy xavfsizlik kengashi sobiq kotibi Aleksandr Danilyuk ushbu xabarga munosabat bildirib, AQSh podpolkovnigiga ushbu taklifni hazil tariqasida aytganligini ma’lum qildi.
Sobiq amaldorning aytishicha, u Vindman bilan ushbu mavzuni muhokama qilgan vaqtda suhbat hazil ohangida kechgan.
“Bu shunchaki hazil taklif bo‘lganiga shubha yo‘q”, — deydi Danilyuk.
U AQSh harbiysiga ushbu lavozimni rasman taklif qilishi uchun Ukraina prezidenti Vladimir Zelenskiydan tegishli tartibda ruxsat olishi lozim bo‘lganligiga urg‘u bergan.
Vindman – millati ukrain bo‘lgan amerika fuqarosi: uning oilasi AQShga bolaligida ko‘chib kelgan. Podpolkovnik rus va ukrain tillarida erkin so‘zlay oladi. Harbiy Danilyukning ushbu taklifni ingliz tilida bildirganini qayd etgan.
AQSh milliy xavfsizlik kengashida Vindman Ukraina masalalari bo‘yicha yetakchi ekspertlardan biri hisoblanadi. Harbiy zobit vakillar palatasi eshituvi vaqtida Ukrainaga ko‘rsatilgan harbiy yordam AQSh prezidenti Donald Trampning ukrainalik hamkasbi Vladimir Zelenskiyga nisbatan bosim o‘tkazishida birlamchi omillardan biri bo‘lgan.
29-avgustda Tramp Ukrainaga harbiy yordam berishni qayta ko‘rib chiqishga qaror qilgan. Tekshiruv vaqtida barcha mablag‘lar muzlatib qo‘yilgandi.
Keyinchalik Vashington Kiyevga yana harbiy yordam ko‘rsatishni boshladi. Sentabrda Donald Tramp va Ukraina prezidenti Vladimir Zelenskiy o‘rtasidagi telefon so‘zlashuvi stenogrammasi oshkor bo‘lishi vaziyatni chigallashtirib yubordi. AQSh Kongressi Zelenskiy bilan suhbat sabab Trampga impichment bilan tahdid qila boshladi. 23-sentabrda AQSh Vakillik palatasining razvedka ishlari bo‘yicha qo‘mitasi raisi Adam Shiff prezident Donald Trampning Ukraina yetakchisiga o‘tkazgan bosimi isbotlangudek bo‘lsa, impichment yagona chora bo‘lishini ma’lum qildi. Vladimir Zelenskiyning suhbat matnining ukrain tilida chop qilinishiga qarshi chiqishi Trampning muammolarini battar ko‘paytirdi. AQSh prezidentining muxolifati Trampni Zelenskiy bilan suhbat vaqtida uni sobiq vitse-prezident Jozef Baydenning o‘g‘liga nisbatan Ukrainada tergov ishlari o‘tkazishga majburlab ukrainalik hamkasbiga bosim o‘tkazganlikda ayblamoqda.
Izoh (0)