Yamanlik isyonchilar Qizil dengizda uchta kemani egallab oldi, ulardan biri Saudiya Arabistoniga qarashli. Bu haqda “Kommersant” xabar berdi. Kemalar Yamanning Salif portiga yuborilgan. Uch kemaning ikkitasi qaysi davlat yoki kompaniyaniki ekani ochiqlanmagan.
Saudiya Arabistoni boshqaruvidagi koalitsiya xusiylarning Janubiy Koreya burg‘ulash moslamasini tortuvchi kemani egallab olganini ma’lum qilgan. Xusiylar vakili Reuters’ga bergan ma’lumotga ko‘ra Qizil dengizda shubhali kema egallab olingan va uning ekipajiga nisbatan kuch ishlatib zo‘ravonlik qilinmayapti.
“Ansor Alloh” harakati iyonchi xusiylari va hukumat o‘rtasida davom etayotgan Yamandagi nizo 2014-yilda boshlangan. 2015-yilda hukumat qo‘shinlariga Saudiya Arabistoni boshqaruvidagi koalitsion armiya ham qo‘shilgan. Shundan buyon Arab koalitsiyasi va “Ansor Alloh” o‘zaro aviazarbalar almashib urush olib bormoqda. Sentabr o‘rtasida xusiy isyonchilari Saudiya Arabistonining ikki ulkan neft zavodiga dronlar hujumini uyushtirgan.Saudi Aramco neft zavodlariga hujum haqidaSentabrda Saudiya Arabistonidagi Saudi Aramco neft zavodlariga dronlar hujumi uyushtirilishi natijasida mamlakatda neftni ishlab chiqarish ikki baravarga qisqargan. Hujum bo‘yicha mas’uliyatni Yamandagi xusiy jangarilari o‘z zimmasiga olgan, keyinroq AQSh hamda Saudiya Arabistoni ushbu hujumlar ortida Eron turganini bildirgan. 11-oktabrda Qizil dengizda Saudiya Arabistonining Jidda portiga yaqin hududda Eron neft tankeriga hujum uyushtirilgan va kemadagi neftning muayyan miqdori suvga oqqan. Tehron ushbu hujum ortida AQSh, Isroil va Saudiya Arabistoni turganini bildirgan.
Izoh (0)