Turkiya tashqi ishlar vaziri Mavlut Chavusho‘g‘lu 18-noyabrda qilgan bayonotida Anqaraning IShID yetakchisi Abu Bakr al-Bag‘dodiyning yo‘q qilinishida muhim rol o‘ynaganini bildirdi. Bu haqda “TASS” xabar berdi.
Vazirning so‘zlariga ko‘ra, Turkiya qo‘lga tushirgan IShID vakili Al-Bag‘dodiyning yaqin odami bo‘lgan va u joylashgan manzil haqida ma’lumot bergan.
“Biz Al-Bag‘dodiyga yaqin bo‘lgan IShID vakilini qo‘lga tushirdik va uni Iroq ixtiyoriga topshirdik. Yakunda aynan u Abu Bakr Al-Bag‘dodiy joylashgan manzil haqida axborot bergan”, — deya ta’kidlagan Turkiya tashqi ishlar vaziri.
Mavzuga doir:
- IShID yetakchisi Abu Bakr al-Bag‘dodiy qanday yo‘q qilindi?
- Tortinchoq bola, ayollarni zo‘rlovchi, birinchi raqamli terrorchi. IShID yetakchisi Abu Bakr al-Bag‘dodiyning hayot yo‘li
- Barisha qishlog‘i aholisi Al-Bag‘dodiyni ipak va matolar sotuvchi savdogar deb hisoblagan
- Al-Bag‘dodiy o‘limidan oldin cho‘ponlar libosida yurgan va xavfsizligi haqida ko‘p qayg‘urgan
IShID yetakchisi Abu Bakr Al-Bag‘dodiy qanday yo‘q qilindi?
Abu Bakr al-Bag‘dodiy 27-oktabrda Suriyaning Idlib viloyatida AQSh harbiylarining havodan yo‘llagan hujumi natijasida o‘lgan. AQSh prezidenti Donald Tramp Iroq, Suriya, Amerika, Rossiya, Turkiya va kurdlarga operatsiyadagi hamkorlik uchun minnatdorchilik bildirgan va Bag‘dodiyning o‘limi haqidagi ma’lumotni rasman tasdiqlagan. IShID sobiq rahbarining jasadi qoldiqlari dengizga oqizilishi va tashkilot rahbarligini kelib chiqishi turkman millatiga mansub iroqlik sobiq zobit Abdulla Qardosh egallashi taxmin qilingandi. Keyinchalik IShID vakillari ham rahnamo halok bo‘lganligini tasdiqladi va AQShdan qasos olishni va’da berdi. IShID terrorchilik tashkilotida Bag‘dodiyning o‘rnini Abu Ibrohim al-Hoshimiy al-Qurayshiy egallagan. 4-noyabr, yakshanba kuni Suriyaning Aleppo viloyatida Turkiya harbiylari Bag‘dodiyning opasi 65 yoshli Rasmiya Avad va uning oila a’zolarini qo‘lga olgan. 7-noyabrda AQSh davlat departamenti IShID terrorchilik tashkilotining yetakchisi Abu Bakr al-Bag‘dodiyning o‘rnini egallagan yangi rahnamo ham tez orada yo‘q qilinishini ma’lum qildi. Ammo u yetakchining ismi Abdulla Qardoshmi yoki Abu Ibrohim al-Hoshimiy al-Qurayshiymi aniqlik kiritmagan. 16-noyabrda Turkiya xavfsizlik kuchlarining IShID sobiq yetakchisi Abu Bakr Al-Bag‘dodiyning kamida 25 nafar qarindoshini qo‘lga tushirgani xabar qilindi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)