Gruziya poytaxti Tbilisi markazida politsiya parlamentga kirishni to‘sib qo‘ygan muxolifat aksiyasi qatnashchilarini tarqatib yubordi. Bu haqda Meduza xabar bermoqda.
17-noyabr, yakshanba kuni boshlangan aksiya o‘tkazilishiga 2020-yili saylovlarni proporsional tizim asosida o‘tkazilishi haqidagi qonun loyihasi yo‘qqa chiqishi sabab bo‘ldi. Qonun parlamentdagi ko‘pchilikning barcha vakillari bilan kelishilgan bo‘lsa ham yetarlicha ovoz to‘plolmadi.
18-noyabr kuni ertalab bir necha deputat parlament binosiga kirishga urindi, biroq namoyishchilar ularni ichkariga qo‘yishdan bosh tortdi. Bino oldidagi maydonda bir necha yuz namoyishchi yig‘ilgandi.
Politsiya maydonni yarim soat mobaynida ixtiyoriy tark etish haqida ultimatum qo‘ydi. Shundan so‘ng aksiya ishtirokchilari suv purkagichlar yordamida tarqatib yuborildi, ularning chodirlari esa yig‘ishtirib tashlandi. Jami 20 kishi, jumladan, “Girchi” muxolifat partiyasi yetakchisi Zurab Japaridze ham qo‘lga olindi.
Izoh (0)