Sankt-Peterburgning Krasnogvardeyskiy tuman sudi o‘zbekistonlik 38 yashar mehnat muhojiriga hujumda gumon qilingan uch nafar o‘smirni kelgusi yil 12-yanvarga qadar vaqtinchalik saqlash hibsxonasiga yubordi. Bu haqda “Fontanka.ru” xabar bermoqda.
Mazkur hodisa 11-noyabr kuni kechki payt ro‘y bergan. 19, 17, 16 va 15 yoshli 4 nafar mahalliy aholi vakili “Kovalevo posti” temir yo‘l bekatida o‘zbekistonlikka hujum qilib, yuziga gaz suyuqligini purkaydi. Shundan so‘ng ayovsiz tepkilab, kamida 5 marotaba pichoqlaydi. Uning qo‘l telefoni va ichida kiyimlari bo‘lgan ryuzakini tortib oladi. O‘g‘irlangan buyumlar qiymati 7850 rubldan (122 dollar atrofida) oshmagan bo‘lsa ham, muhojirga jiddiy jarohat yetkaziladi.
Tergov qo‘mitasi shahar bo‘limi matbuot xizmatiga ko‘ra, hujum “ekstremistik kayfiyatlar” tufayli amalga oshirilgan, o‘smirlar ijtimoiy tarmoqlardagi millatchilik ruhidagi guruhlarga kirib turgani aniqlangan.
Mazkur hujumda ishtirok etgan to‘rtinchi qatnashchi ozodlikni cheklash chorasidan qutulib qolgan. Uning 15 yoshda ekanligi aytilmoqda.
Izoh (0)