“Kosondagi voqea — ‘maktab—oila—mahalla’ hamkorligidagi bo‘shliq oqibati”. Xotin-qizlar qo‘mitasi o‘quvchi qizning 15 yoshida ona bo‘lganiga munosabat bildirdi

Qashqadaryo viloyatining Koson tumanida 15 yoshli qizning homilador bo‘lib qolganiga mahalla, maktab, tug‘uruqxona mas’ullari, xotin-qizlar bo‘yicha mutasaddilarnin befarqligi sabab bo‘lgan. Bu haqda Xotin-qizlar qo‘mitasi raisi birinchi o‘rinbosari Zulayho Mahkamova ma’lum qildi, deya xabar bermoqda “Daryo” muxbiri Musulmonbek Ibrohimov.

Avvalroq Kosonda 2018-yil may oyida o‘quvchi qiz 15 yoshida ona bo‘lgani, bu haqda maktab rahbariyati, xalq ta’limi bo‘limi va tug‘ruqxona mas’ullari o‘z vaqtida ma’lum qilmagani haqida xabar berilgan edi. Keyinroq Qashqadaryo viloyat Sog‘liqni saqlash boshqarmasi yosh ona chaqalog‘ini tug‘ruqxonaga tashlab qochib ketgani, tug‘uruqxona darhol tegishli idoralarga xabar berganinini bildirgandi.

Xotin-qizlar qo‘mitasi raisi birinchi o‘rinbosarining so‘zlariga ko‘ra, Kosondagi voqea yuzasidan qo‘shimcha o‘rganish ishlari davom etmoqda, natijalari bo‘yicha ma’lumot beriladi.

“Lekin vaziyatning bu darajaga kelib qolishiga maktab jamoasi, sinf rahbarlari, o‘qituvchilari, mahalladagi mutaxassisimiz, boshlang‘ich tashkilotdagi xotin-qizlarimiz va biz bilan ish olib boruvchi ayollarimizning befarqligi, tarbiyadagi muammolar, ‘maktab—oila—mahalla’ hamkorligidagi bo‘shliq sabab bo‘lgan”, — dedi Zulayho Mahkamova.