Fergana News agentligi “Koreysi pritormozili” nomli maqola e’lon qilgan. Maqolada Farg‘ona shahri markazidagi aholi turar joy uylari buzilgani va ularning o‘rnida bo‘shagan yer maydoni koreyalik tadbirkorlarga berilgani, ammo ular hanuzgacha bu yerda qurilish ishlarini boshlamaganligi haqida gap boradi.
Farg‘ona viloyati hokimligi axborot xizmati mazkur maqolaga munosabat bildirdi.
Ma’lum qilinishicha, Farg‘ona shahar hokimining 2019-yil 8-yanvardagi qaroriga asosan shaharning Navoiy, Sohibqiron Temur va Farobiy ko‘chalari kesishmasida joylashgan 1946—1951-yillarda qurilgan ikki qavatli ma’nan eskirgan ayrim turar va noturar binolarni buzish, shuningdek, bo‘shagan yer maydonlarini shahar zaxirasiga qaytarish belgilangan.
Qayd etilishicha, bu binolar avariya holatida bo‘lib, asosan xom g‘ishtdan tiklanib, tomlari yog‘och va qamish bilan yopilgan, poydevorlari nurab, ularda yorilish hollari kuzatilgan. Jami ikki qavatli 12 ta uy Farg‘ona viloyat qurilish sohasidagi hududiy nazorat inspeksiyasi, Farg‘ona shahar Yong‘in xavfsizligi bo‘limi, Farg‘ona shahar DSENM va boshqa tegishli tashkilotlarning ushbu uylarda yashash belgilangan talablarga javob bermasligi haqidagi xulosalari olinganidan so‘ng unda yashaydigan aholini oldindan ogohlantirilib, ularning roziligi bilan buzilgan.
Viloyat hokimligining xabar berishicha, mazkur uylarda jami 120 ta xonadon mavjud bo‘lib, uy egalariga Farg‘ona shahar Registon ko‘chasidagi yangi qurilgan, teng qiymatdagi belgilangan talablarga javob beradigan kvartiralar bepul ajratib berilgan.
“Avariya holatida bo‘lgani uchun buzilgan ikki qavatli uylar o‘rni koreyalik tadbirkorlariga berilgani haqidagi axborot tuhmatdan iboratdir. Agar shunday bo‘lganida ham, bo‘shatilgan yer maydonlari amaldagi qonunchilikka asosan auksion savdosida sotilgan bo‘lar edi”, — deyiladi viloyat hokimligi munosabatida.
Farg‘ona viloyati hokimligi axborot xizmatining ta’kidlashicha, hozirda bu maydonda ko‘p qavatli turar va noturar inshootlar qurilishi loyihasi ustida ish olib borilmoqda. Uning qurilishi yuzasidan bir qator xorijiy va mahalliy investorlar, jumladan, Turkiya, BAA, Rossiya kompaniyalari bilan muzokoralar olib borilmoqda hamda ular taklif etgan loyihalar ham o‘rganilmoqda. Yaqin kunlarda ularning qurilish ishlari boshlanadi.
Izoh (0)