Fergana News агентлиги «Корейци притормозили» номли мақола эълон қилган. Мақолада Фарғона шаҳри марказидаги аҳоли турар жой уйлари бузилгани ва уларнинг ўрнида бўшаган ер майдони кореялик тадбиркорларга берилгани, аммо улар ҳанузгача бу ерда қурилиш ишларини бошламаганлиги ҳақида гап боради.
Фарғона вилояти ҳокимлиги ахборот хизмати мазкур мақолага муносабат билдирди.
Маълум қилинишича, Фарғона шаҳар ҳокимининг 2019 йил 8 январдаги қарорига асосан шаҳарнинг Навоий, Соҳибқирон Темур ва Фаробий кўчалари кесишмасида жойлашган 1946—1951 йилларда қурилган икки қаватли маънан эскирган айрим турар ва нотурар биноларни бузиш, шунингдек, бўшаган ер майдонларини шаҳар захирасига қайтариш белгиланган.
Қайд этилишича, бу бинолар авария ҳолатида бўлиб, асосан хом ғиштдан тикланиб, томлари ёғоч ва қамиш билан ёпилган, пойдеворлари нураб, уларда ёрилиш ҳоллари кузатилган. Жами икки қаватли 12 та уй Фарғона вилоят қурилиш соҳасидаги ҳудудий назорат инспекцияси, Фарғона шаҳар Ёнғин хавфсизлиги бўлими, Фарғона шаҳар ДСЭНМ ва бошқа тегишли ташкилотларнинг ушбу уйларда яшаш белгиланган талабларга жавоб бермаслиги ҳақидаги хулосалари олинганидан сўнг унда яшайдиган аҳолини олдиндан огоҳлантирилиб, уларнинг розилиги билан бузилган.
Вилоят ҳокимлигининг хабар беришича, мазкур уйларда жами 120 та хонадон мавжуд бўлиб, уй эгаларига Фарғона шаҳар Регистон кўчасидаги янги қурилган, тенг қийматдаги белгиланган талабларга жавоб берадиган квартиралар бепул ажратиб берилган.
«Авария ҳолатида бўлгани учун бузилган икки қаватли уйлар ўрни кореялик тадбиркорларига берилгани ҳақидаги ахборот туҳматдан иборатдир. Агар шундай бўлганида ҳам, бўшатилган ер майдонлари амалдаги қонунчиликка асосан аукцион савдосида сотилган бўлар эди», — дейилади вилоят ҳокимлиги муносабатида.
Фарғона вилояти ҳокимлиги ахборот хизматининг таъкидлашича, ҳозирда бу майдонда кўп қаватли турар ва нотурар иншоотлар қурилиши лойиҳаси устида иш олиб борилмоқда. Унинг қурилиши юзасидан бир қатор хорижий ва маҳаллий инвесторлар, жумладан, Туркия, БАА, Россия компаниялари билан музокоралар олиб борилмоқда ҳамда улар таклиф этган лойиҳалар ҳам ўрганилмоқда. Яқин кунларда уларнинг қурилиш ишлари бошланади.
Изоҳ (0)