Gaz bilan bog‘liq fojialar. Toshkent viloyatining Quyi Chirchiq tumanidagi namunaviy uylarning birida isitish qozonidan gaz sizib chiqib, xonada to‘planib qolishi oqibatida portlash yuz bergan; ikki kishi voqea joyida halok bo‘lgan, to‘rt kishi esa kasalxonaga yotqizilgan. Qashqadaryoda sakkiz kishi is gazidan zaharlangan va kasalxonaga yotqizilgan, Nukusda esa er-xotin is gazidan zaharlanib o‘lgan.
Sobiq xalq ta’limi vaziri, hozirda Xalq demokratik partiyasi raisi hisoblangan Ulug‘bek Inoyatovning fikricha, Toshkentda 2,5 million so‘m oylik maosh bilan bir nafar boquvchi besh kishidan iborat oilani boqishi mumkin. Ulug‘bek Inoyatovning o‘z oilasi necha kishidan iborat ekanligi va u oila boquvchisi sifatida qancha pul topishiga aniqlik kiritilmagan.
Oliy va o‘rta maxsus ta’lim vazirligi O‘zbekistonda talaba fanni o‘zlashtirolmasa, uning o‘qituvchisini ishdan haydashni taklif qilmoqda (o‘qituvchi kadrlar yetishmayotgan vaqtda — g‘aroyib taklif). Ikkichi talabalarda o‘z o‘qituvchilarini jazolash uchun bu qadar qulay imkoniyat hali hech yuzaga kelmagandi. Kamiga, talabalar o‘qituvchilarining faoliyatini anonim baholashlari ham mumkin bo‘larmish.
“Tug‘ruq payti yaqinlashgan ayolni ot yoki eshakda daryodan olib o‘tamiz”, deydi Yakkabog‘dagi “Daryo” mahallasi aholisi. Qishloqni tashqi dunyo bilan bog‘lab turgan yo‘l 2019 yil mayidagi sellar vaqtida batamom yuvilib ketgan. Bu mahallaga eng yaqin tibbiyot muassasasi esa 14 kilometr uzoqlikda joylashgan.
Qashqadaryoda 5 nafar erkak 26 yoshli qizni zo‘rladi. Voqea oktabrda, tungi soat 1:30 da yuz bergan. Gumonlanuvchilarga nisbatan Jinoyat kodeksining 118-moddasi 2-qismi bilan ish qo‘zg‘atilgan (aybdor deb topilsa, 10 yilgacha qamalishi mumkin). Ushbu modda bo‘yicha, xususan, “o‘ldirib yuboraman” deb guruh bo‘lib zo‘rlaganlar, shuningdek, avval jinsiy ehtiyojini zo‘rlik ishlatib g‘ayritabiiy usulda qondirgani uchun javobgarlikka tortilganlar jazolanadi.
O‘zbekistonda yana nima yangiliklar? O‘zbekistonda hafta oxiriga qadar sovuq havo hukmronlik qiladi. O‘zbekiston ishchilar huquqlari buzilishi bo‘yicha eshituvda AQShni yutib chiqdi. G‘uzor tumani hokimi saylovga tayyorgarlikda ko‘zbo‘yamachilikka yo‘l qo‘ygani bois hayfsan oldi. Farg‘onada masjid ochishga ruxsatnoma olib berishni va’da qilib qariyb 60 million so‘mni o‘zlashtirgan shaxs ushlandi. O‘zbekistonda issiqlik ta’minoti to‘lovlarida o‘zgarish bo‘lishi mumkin. O‘zbekistonda sigaret qadoqlarida qo‘rqinchli suratlar paydo bo‘lishi kutilmoqda. Jerar Depardye O‘zbekistonning Fransiyadagi turizm elchisi etib tayinlandi.
Boliviya prezidenti Evo Morales iste’foga chiqdi. “Men hamkasblarim tahdid, ta’qib va hujumlarga duch kelmasligi uchun iste’foga chiqaman”, — dedi Morales Chimore shahridagi matbuot anjumanida chiqishi chog‘ida. Shundan so‘ng politsiya uni hibsga olishga urinayotgani ma’lum bo‘ldi, Meksika esa Evo Moralesga La-Pasdagi elchixonasida boshpana taklif qildi.
Jahonda bundan boshqa yana nima bo‘lyapti? Dubayda kuchli yomg‘ir sabab dunyoning eng ulkan savdo markaziga suv toshdi. Afg‘oniston hukumati mamlakat hududida IShIDning tor-mor etilganini ma’lum qildi. Qozog‘iston prezidenti o‘z qarorgohida chiroqning o‘chganligi yuzasidan surishtiruv o‘tkazishni buyurdi. Fransiyada 2022-yilgacha barcha ko‘mir elektr stansiyalarini yopish rejalashtirilmoqda. Turkmanistonda xorijga ketishni istagan fuqarolar 2 mingdan 5 minggacha AQSh dollarida pora bermoqda. AQSh Iroq hukumatiga zo‘ravonlikni to‘xtatish va saylovlar o‘tkazishni tavsiya qildi. Sankt-Petrburgda o‘zbekistonlik erkak nogironlik aravachasida harakatlanuvchi 26 yoshli qizni zo‘rlaganlikda ayblanmoqda.
O‘qish qat’iy tavsiya etiladi: Bir shaharda ikki davlat. Berlin devori va uning qulatilishi haqida.
Izoh (0)