Qozog‘iston prezidenti Qosim-Jo‘mart To‘qayev Nur-Sulton shahrida yuz bergan elektr tarmog‘idagi avariya va shaharning ma’lum qismida, jumladan prezident qarorgohi, parlamenting ikki palatasi va hukumat uyi binolarida chiroqning o‘chib qolgani yuzasidan surishtiruv o‘tkazish haqida buyruq berdi. Bu haqda To‘qayevning matbuot kotibi Berik Kurmangali ma’lumotiga asoslanib “Interfaks” xabar qildi.
Maxsus komissiyaga bosh vazir o‘rinbosari Roman Sklyar raislik qiladi.
“Surishtiruv ishlarini to‘g‘ri tashkillashtirish, aybdorlarni topish va vaziyat taqozo etsa ushbu ish yuzasidan tegishli chora ko‘rishni huquq-tartibot organlariga topshirish lozim”, — deya Qozog‘iston prezidentining so‘zlarini keltirgan uning matbuot kotibi.
To‘qayev bunday holat kelajakda takrorlanmasligi bo‘yicha tegishli chora-tadbirlarni amalga oshirishni ham talab qilgan.
10-noyabr, yakshanba kuni Nur-Sulton shahrining muayyan qismi ‘Levoberejnaya’ podstansiyasidagi kabel kanalining yonishi oqibatida elektr ta’minotidan uzilib qolgan. Shahar hokimi Altay Kulginov ushbu liniyaga ulangan iste’molchilarning elektr ta’minoti o‘t o‘chirish xodimlarining xavfsizligini ta’minlash maqsadida vaqtinchalik o‘chirilganini ma’lum qilgan. Kabel liniyasidagi avariya kuzatilganining oqibatida to‘qqizta ko‘p qavatli uy, To‘qayev rezidensiyasi, senat, Qonunchilik majlisi, Vazirliklar uyi, hukumat uyi va Oliy sudda chiroq o‘chgan.
Ushbu hudud 11-noyabr dushanba tongida elektrga qayta ulangan. ‘Bayterek’ monumentida, ‘Karvon’ savdo-ko‘ngilochar markazi, ‘Zumrad mavzesi’ biznes-markazi, Milliy kutubxona va arxiv binolarida ham chiroqni yoqish yuzasidan avariya-tiklash ishlari olib borilmoqda.