“O‘zstandart” elektrotexnika mahsulotlari importi bo‘yicha loyiha talablarini yengillashtirdi

“O‘zstandart” agentligi O‘zbekistonga elektrotexnika olib kirishning yangi tartibini joriy etish taklif qilinayotgan Vazirlar Mahkamasi qarori loyihasiga o‘zgartirish kiritdi. Bu haqda agentlikning boshqarma boshliqlari Ruslan Husnullin va Sherzod Inog‘omovga tayanib, Spot xabar berdi.

Hukumat qarori loyihasi bilan 2020-yil 1-yanvardan elektrotexnika mahsulotlarini O‘zbekistonga import qilishning yangi tartibini joriy qilish ko‘zda tutilgan. Qarorning dastlabki matniga ko‘ra, 2020-yil 1-yanvardan O‘zbekistonda 12 turdagi maishiy texnika, qurilmalar va mobil telefonlarning savdosi faqat ishlab chiqaruvchilar-zavodlar va ularning rasmiy dilerlari tomonidan amalga oshirilishiga ruxsat berilishi ko‘zda tutilgan, bunda ularning Qoraqalpog‘iston Respublikasi, viloyatlar va Toshkent shahrida kamida bittadan mulk huquqi asosidagi xizmat ko‘rsatish markazi mavjud bo‘lishi talab qilinadi.Yangi tartib qo‘llanilishi mumkin bo‘lgan elektrotexnika mahsulotlari ro‘yxatiga muzlatgichlar, ventilyatorlar, konditsionerlar, idish va kir yuvish mashinalari, changyutgichlar, telefon apparatlari va boshqalar kirgan.

Monopoliyaga qarshi kurash qo‘mitasi mazkur band jismoniy va yuridik shaxslar, tadbirkorlik subyektlarining manfaatlariga zarar yetkazishi va raqobat muhitiga salbiy ta’sir ko‘rsatishi mumkinligi sababli, uni qayta ko‘rib chiqishni taklif qildi.

Agentlik vakillarining ma’lum qilishicha, qo‘mita taklifi o‘rganib chiqilgan va bu bandni o‘zgartirishga qaror qilingan. Unga ko‘ra, ayni paytda respublika bo‘yicha bitta xizmat ko‘rsatish markazining mavjud bo‘lishi yetarli hisoblanadi va uning ishlab chiqaruvchi mulk huquqi asosida ochilishi majburiy emas.

Shuningdek, Monopoliyaga qarshi kurash qo‘mitasining taklifida mahsulotlar sinov laboratoriyasining tanlanishi sertifikatsiya bo‘yicha organ ixtiyorida qolishi hamda sinov shartlarining buyurtmachi ishtirokisiz belgilanishi korrupsiya holatlarini yuzaga keltirishi mumkinligi ko‘rsatib o‘tilgan.

Qo‘mita sinovlarni o‘tkazish imkoniyati, joyi va shartlarini aniqlash jarayonini sertifikatsiya bo‘yicha idora tomonidan buyurtmachi bilan kelishilgan holda amalga oshirilishini taklif qilgan.