O‘zbekiston Respublikasi Oliy Majlisi Senati raisi Tanzila Norboyeva Qozog‘istonga tashrifi doirasida mamlakat prezidenti Qosim-Jo‘mart To‘qayev bilan uchrashdi. Bu haqda O‘zbekiston Senati axborot xizmati xabar berdi.
Mavzuga doir: Tanzila Norboyevaning Qozog‘istonga tashrifi boshlandi
Qozog‘iston rahbari Tanzila Norboyevaning tashrifi parlamentlararo aloqalarni rivojlantirishi va davlatlararo munosabatlarga qo‘shimcha turtki berishi tufayli katta ahamiyatga ega ekanligini ta’kidladi.
“Qozog‘iston va O‘zbekiston o‘zaro hamkorlikni rivojlantirishdan manfaatdor bo‘libgina qolmay, balki qator masalalarda bir-birini to‘ldirib turadi. Shuning uchun muvaffaqiyat qozonishimiz muqarrar. Boz ustiga, biz hamkasbim O‘zbekiston Prezidenti Shavkat Mirziyoyev bilan har jabhada hamkorlikni rivojlantirish uchun faol harakat qilishga kelishib olganmiz”, — dedi Qosim-Jo‘mart To‘qayev.
Qozog‘iston prezidenti 2018-yilda ikki mamlakat o‘rtasidagi savdo hajmi 2,5 milliard dollarga yetganligiga va shu yilning to‘qqiz oyi davomida o‘tgan yilgi ko‘rsatkichdan oshib ketganligiga urg‘u berdi.
O‘z navbatida, Tanzila Norboyeva iliq kutib olganligi uchun minnatdorlik bildirdi va O‘zbekiston Prezidenti Shavkat Mirziyoyevning tabrik so‘zini yetkazdi. Senat rahbari Qosim-Jo‘mart To‘qayevning davlat rahbari lavozimiga saylanishi uning avvalgi lavozimda tajribali diplomat, obro‘-e’tiborli rahbar va eng asosiysi, Qozog‘istonda davlatchilikni mustahkamlash, xavfsizlikni ta’minlash va iqtisodiyotni rivojlantirish yo‘lida kuchli siyosat olib borgan birinchi prezident Nursulton Nazarboyev g‘oyalarini davom ettiruvchi shaxs sifatidagi faoliyatining e’tirofi ekanligini ta’kidladi.
O‘zbekiston Oliy Majlisi Senati raisi O‘zbekistonda joriy yil Qozog‘iston yili o‘tkazilishi munosabati bilan amalga oshirilayotgan keng ko‘lamli tadbirlarni xalqlar yaqinlashishiga yorqin misol qilib keltirdi. Tanzila Norboyeva Qozog‘iston prezidenti Qosim-Jo‘mart To‘qayevning O‘zbekistonga birinchi davlat tashrifi ham mamlakatlar o‘rtasidagi o‘zaro hamkorlikni yanada faollashtirishga turtki berganligini ta’kidladi.
Uchrashuv davomida tomonlar yuksak darajada erishilgan kelishuvlar ijrosining borishini va keng ko‘lamli ikki tomonlama hamkorlikning boshqa masalalarini muhokama qildi. Shuningdek, mintaqaviy va xalqaro kun tartibidagi dolzarb mavzular yuzasidan ham fikr almashildi.
Izoh (0)