«Ўзстандарт» электротехника маҳсулотлари импорти бўйича лойиҳа талабларини енгиллаштирди

«Ўзстандарт» агентлиги Ўзбекистонга электротехника олиб киришнинг янги тартибини жорий этиш таклиф қилинаётган Вазирлар Маҳкамаси қарори лойиҳасига ўзгартириш киритди. Бу ҳақда агентликнинг бошқарма бошлиқлари Руслан Ҳуснуллин ва Шерзод Иноғомовга таяниб, Spot хабар берди.

Ҳукумат қарори лойиҳаси билан 2020 йил 1 январдан электротехника маҳсулотларини Ўзбекистонга импорт қилишнинг янги тартибини жорий қилиш кўзда тутилган. Қарорнинг дастлабки матнига кўра, 2020 йил 1 январдан Ўзбекистонда 12 турдаги маиший техника, қурилмалар ва мобиль телефонларнинг савдоси фақат ишлаб чиқарувчилар-заводлар ва уларнинг расмий дилерлари томонидан амалга оширилишига рухсат берилиши кўзда тутилган, бунда уларнинг Қорақалпоғистон Республикаси, вилоятлар ва Тошкент шаҳрида камида биттадан мулк ҳуқуқи асосидаги хизмат кўрсатиш маркази мавжуд бўлиши талаб қилинади.Янги тартиб қўлланилиши мумкин бўлган электротехника маҳсулотлари рўйхатига музлатгичлар, вентиляторлар, кондиционерлар, идиш ва кир ювиш машиналари, чангютгичлар, телефон аппаратлари ва бошқалар кирган.

Монополияга қарши кураш қўмитаси мазкур банд жисмоний ва юридик шахслар, тадбиркорлик субъектларининг манфаатларига зарар етказиши ва рақобат муҳитига салбий таъсир кўрсатиши мумкинлиги сабабли, уни қайта кўриб чиқишни таклиф қилди.

Агентлик вакилларининг маълум қилишича, қўмита таклифи ўрганиб чиқилган ва бу бандни ўзгартиришга қарор қилинган. Унга кўра, айни пайтда республика бўйича битта хизмат кўрсатиш марказининг мавжуд бўлиши етарли ҳисобланади ва унинг ишлаб чиқарувчи мулк ҳуқуқи асосида очилиши мажбурий эмас.

Шунингдек, Монополияга қарши кураш қўмитасининг таклифида маҳсулотлар синов лабораториясининг танланиши сертификация бўйича орган ихтиёрида қолиши ҳамда синов шартларининг буюртмачи иштирокисиз белгиланиши коррупция ҳолатларини юзага келтириши мумкинлиги кўрсатиб ўтилган.

Қўмита синовларни ўтказиш имконияти, жойи ва шартларини аниқлаш жараёнини сертификация бўйича идора томонидан буюртмачи билан келишилган ҳолда амалга оширилишини таклиф қилган.