Toshkentda Vebster universitetining filiali ochildi

1-noyabr kuni Vebster universitetining Markaziy Osiyodagi filiali — Toshkent shahridagi ta’lim dasturlarini amalga oshirish markazining tantanali ochilish marosimi bo‘lib o‘tdi, deb xabar beradi O‘zA

Marosimda Vebster universiteti kansleri Elizabet Strobl rahbarligidagi AQSh delegatsiyasi vakillari, O‘zbekiston Prezidenti davlat maslahatchisi Abdujabbor Abduvohidov, Oliy va o‘rta maxsus ta’lim vaziri Inomjon Majidov, vazir o‘rinbosarlari va rektorlar ishtirok etdi.

Avvalroq, O‘zbekiston Prezidentining qarori bilan Toshkent shahrida Vebster universitetining ta’lim dasturlarini amalga oshirish markazi tashkil etilishi haqida xabar berilgandi.

O‘quv jarayonlari 2019—2020-o‘quv yilidan o‘quv jarayonlari boshlandi va bu yerda bakalavriatning asosiy 14 ta ta’lim yo‘nalishlari hamda 16 ta magistratura mutaxassisliklarida kadrlar tayyorlash yo‘lga qo‘yildi.

Hozirda oliygohda 470 nafar talaba tahsil olmoqda va Vebster universitetining Toshkent filiali talabalar soni bo‘yicha Tailand, Xitoy, Niderlandiya, Shveysariya, Gretsiya, Avstriya va Ganadagi filiallarni ortda qoldirdi.

Universitetda o‘qitish kunduzgi ta’lim shaklida, to‘lov-kontrakt asosida, ingliz tilida, jumladan, elektron ta’lim va masofaviy ta’lim texnologiyalarini qo‘llagan holda Vebster universiteti tomonidan tasdiqlangan o‘quv rejalar va dasturlar asosida amalga oshirilmoqda.