1 ноябрь куни Вебстер университетининг Марказий Осиёдаги филиали — Тошкент шаҳридаги таълим дастурларини амалга ошириш марказининг тантанали очилиш маросими бўлиб ўтди, деб хабар беради ЎзА
Маросимда Вебстер университети канцлери Элизабет Стробл раҳбарлигидаги АҚШ делегацияси вакиллари, Ўзбекистон Президенти давлат маслаҳатчиси Абдужаббор Абдувоҳидов, Олий ва ўрта махсус таълим вазири Иномжон Мажидов, вазир ўринбосарлари ва ректорлар иштирок этди.
Аввалроқ, Ўзбекистон Президентининг қарори билан Тошкент шаҳрида Вебстер университетининг таълим дастурларини амалга ошириш маркази ташкил этилиши ҳақида хабар берилганди.
Ўқув жараёнлари 2019—2020-ўқув йилидан ўқув жараёнлари бошланди ва бу ерда бакалавриатнинг асосий 14 та таълим йўналишлари ҳамда 16 та магистратура мутахассисликларида кадрлар тайёрлаш йўлга қўйилди.
Ҳозирда олийгоҳда 470 нафар талаба таҳсил олмоқда ва Вебстер университетининг Тошкент филиали талабалар сони бўйича Таиланд, Хитой, Нидерландия, Швейцария, Греция, Австрия ва Ганадаги филиалларни ортда қолдирди.
Университетда ўқитиш кундузги таълим шаклида, тўлов-контракт асосида, инглиз тилида, жумладан, электрон таълим ва масофавий таълим технологияларини қўллаган ҳолда Вебстер университети томонидан тасдиқланган ўқув режалар ва дастурлар асосида амалга оширилмоқда.
Битирувчиларга Ўзбекистонда олий маълумот тўғрисидаги ҳужжат сифатида тан олинадиган Вебстер университетининг дипломи берилади.
Изоҳ (0)