O‘zbekiston Prezidentining 2019-yil 3-apreldagi PQ-4265-sonli “Kimyo sanoatini yanada isloh qilish va uning investitsiyaviy jozibadorligini oshirish chora-tadbirlari to‘g‘risida”gi qaroriga muvofiq “Qo‘ng‘irot soda zavodi” MChJ ustav kapitalining 51 foiz miqdoridagi ulushi sotuvga qo‘yiladi. Bu haqda Davlat aktivlarini boshqarish agentligi xabar berdi.
Davlat mulkini sotishda tender savdolari o‘tkazish bo‘yicha Davlat komissiyasining qarori bilan “Qo‘ng‘irot soda zavodi” MChJning ulushini sotish shartlariga, Ernst & Young Advisory MChJ investitsiya maslahatchisi ishtirokida salohiyatli investorlarning eng yaxshi takliflarini tanlash yo‘li bilan ulushni quyidagi tartib va shartlarda sotishni nazarda tutuvchi o‘zgartirishlar kiritilgan.
Salohiyatli investorlarning eng yaxshi takliflarini tanlash yo‘li bilan sotish tartibi quyidagi mexanizmni nazarda tutadi:
- Kelishilgan uzun ro‘yxatdagi potensial investorlarga tizerni tarqatish;
- Qiziqish bildirgan salohiyatli investorlar bilan maxfiylik to‘g‘risidagi shartnomani imzolash. Qisqa ro‘yxatni belgilash, maxfiylik to‘g‘risidagi shartnomani imzolash yakuni bo‘yicha investorlarga axborot memorandumi va tartib xatini taqdim etish. Investorlar tomonidan Majburiy bo‘lmagan takliflar taqdim etilishi.
- Investorlar tomonidan taqdim etilgan Majburiy bo‘lmagan takliflarni tahlil qilish, kelishish va eng jozibadorini tanlash. Majburiy bo‘lmagan takliflar tahlili natijasi bo‘yicha tanlangan salohiyatli investorlarga foydalanish huquqini bergan holda virtual ma’lumotlar xonasini tayyorlash va ochish.
- Sotilayotgan obyektni salohiyatli investorlar tomonidan kompleks tekshiruvidan o‘tkazish. Investitsion maslahatchi tomonidan kompleks tekshiruvni muvofiqlashtirish. O‘tkazilgan kompleks tekshiruvlar natijalari bo‘yicha investorlar tomonidan Majburiy takliflarni taqdim etish.
Sotish shartlari:
- korxonaning asosiy faoliyat turini saqlab qolish;
- O‘zbekiston Prezidentining 2019-yil 3-apreldagi PQ-4265-sonli qaroriga muvofiq kalsiynatsiyalangan soda ishlab chiqarishni yiliga 200 ming tonnadan 450 ming tonnagacha kengaytirish va boshqa (yangi) turdagi mahsulotlar ishlab chiqarishni tashkil qilish (investitsion majburiyatlarini bajarish muddatlari 2019—2024-yillar.);
- yangi ish o‘rinlarini yaratish shaklidagi ijtimoiy majburiyatlarni qabul qilish.
Izoh (0)