31-oktabr kuni Turkiyaning Atlasglobal Airlines aviakompaniyasiga qarashli Airbus-321 samolyoti “Istanbul—Buxoro” yo‘nalishidagi ilk charter reysni amalga oshirdi. Bu haqda Turizmni rivojlantirish davlat qo‘mitasi xabar berdi.
Turkiyaning Atlasglobal Airlines aviakompaniyasi tomonidan O‘zbekistonning Grand Atlas Discovery kompaniyasi ko‘magida yo‘lga qo‘yilgan “Istanbul—Buxoro” birinchi charter reysi Buxoro xalqaro aeroportida viloyat hokimligining qator mutasaddi tashkilotlari vakillari tomonidan tantanali ravishda kutib olindi.
Mavzuga doir: Turkiya aviakompaniyasi Istanbuldan Buxoro va Samarqandga charter reyslarni yo‘lga qo‘yadi
“Tarixiy merosga to‘la Buxoroni qardosh turk xalqi kelib ko‘rishi biz uchun juda muhim. Biz turoperator sifatida O‘zbekistonga keladigan sayyohlar soni oshirish masalasida qo‘limizdan kelgan barcha ishlarni qilishga tayyormiz. Sayohat xarajatlari muhim omillardan biridir, u hamyonbop bo‘lgani sayin turistlar soni ortib boraveradi. Yurtingizdagi bunday islohotlardan juda xursandmiz”, — deydi Uchbey turistik kompaniyasi rahbari Muhammad Gulseren.
Uchbey turistik firmasi idorasi Anqarada joylashgan bo‘lib, u Turkiya Madaniyat va turizm vazirligi hamda Türsab Turkiya sayohatlar agentliklari birlashmasining ruxsati asosida ish olib boradi. Turkiyada 11 mingga yaqin turagent faoliyat yuritadi, ularning bir qismi “A” toifasidagi agentliklar bo‘lib, xorijiy sayohatlarni uyushtirish huquqiga ega. Uchbey turistik firmasi ham mana shunday huquqqa ega. Tashkilot 1998-yildan beri O‘zbekistonga sayohatlarni tashkillashtirib keladi.
Navbatdagi charter reys 4-noyabr kuni “Istanbul—Samarqand” yo‘nalishida amalga oshirilishi kutilmoqda.
Izoh (0)