Bugun, 2-noyabr kuni Shanxay hamkorlik tashkilotiga a’zo davlatlar hukumat rahbarlari kengashining Toshkentda bo‘lib o‘tayotgan yig‘ilishida so‘zga chiqqan O‘zbekiston bosh vaziri Abdulla Aripov ShHTga a’zo davlatlarni iyun oyida tashkilotning Bishkek sammitida Prezident Shavkat Mirziyoyev tomonidan ilgari surilgan tashabbuslarni qo‘llab-quvvatlashga chaqirdi, deb xabar beradi “Gazeta.uz”.
“Jahon iqtisodiyotidagi notinch vaziyat davom etar ekan, qo‘shma sarmoyaviy, infratuzilma, transport va agrosanoat loyihalarini amalga oshirishda faol hamkorlik zarur. Ishonchimiz komilki, Prezidentning Bishkek sammiti doirasida ilgari surgan tashabbuslari ushbu vazifalarni amalga oshirish yo‘lida xizmat qiladi”, — deydi yana bir bor ShHTning iqtisodiy forumini har yili o‘tkazish taklifini bildirgan Abdulla Aripov.
Bundan tashqari, bosh vazir suv tanqisligi muammosini yechish yo‘lida birgalikda izlanishlar olib borish maqsadida “Yashil kamar” dasturini ishlab chiqish va qabul qilishni taklif qildi. Shuningdek, Abdulla Aripov, Orol inqirozi oqibatlarining global miqyosini hisobga olgan holda Orolbo‘yi mintaqasini ekologik innovatsiyalar va texnologiyalar zonasi deb e’lon qilish tashabbusini qo‘llab-quvvatlash taklifini bildirdi.
O‘zbekiston ShHTning qator takliflarini qo‘llab-quvvatladi. Xususan, bosh vazir Rossiyaning raqamli davrda uzoq qishloq hududlarini rivojlantirish konsepsiyasini va uni amalga oshirish bo‘yicha harakatlar rejasini ishlab chiqish taklifini mamnuniyat bilan qabul qildi.
Xitoy tomonining ShHT mamlakatlarida xalq diplomatiyasi institutlarini tashkil etish va ular o‘rtasidagi munosabatlarni rivojlantirish to‘g‘risidagi taklifi ham qo‘llab-quvvatlandi.
ShHTga a’zo davlatlar hukumat rahbarlari kengashining keyingi majlisiga birinchi marotaba Hindiston raislik qiladi.
Izoh (0)