Shanxay hamkorlik tashkiloti (ShHT)ga a’zo mamlakatlarning hukumat rahbarlari yangi, 2035-yilgacha mo‘ljallangan ko‘p tomonlama savdo-iqtisodiy hamkorlik dasturini qabul qildi. “Gazeta.uz”ning xabar berishicha, ShHT Hukumat rahbarlari kengashi majlisi 2-noyabr kuni Toshkentda bo‘lib o‘tdi.
Dasturning avvalgi, 2003-yilda kuchga kirgan tahriri 2020-yilga qadar amalda bo‘ladi. Dasturning yangi talqinida asosiy e’tibor raqamlashtirish va yuksak texnologiyalarga qaratilgan.
Yangi hujjat savdo va investitsiyalar, bank va moliyaviy hamkorlik, transport va logistika, sanoat, qishloq xo‘jaligi, energetika, bojxona, innovatsiyalar, axborot texnologiyalari, hududlararo munosabatlar, turizm, ekologiya va ta’lim sohalaridagi ustuvor vazifalarni belgilab beradi.
Mavzuga doir: Belarus ShHT doirasida yadroviy xavfsizlik bo‘yicha muntazam uchrashuvlar o‘tkazishni taklif qildi
Ushbu hujjatda, jumladan, chegaraoldi hududlarning o‘zaro munosabatlari haqida ham so‘z boradi. Asosiy e’tibor raqamli texnologiyalar va innovatsion ishlanmalardan foydalanishga qaratilgan. Konsepsiyani ko‘rib chiqish uchun 2020-yil 22—23-iyul kunlari Sankt-Peterburgda bo‘lib o‘tadigan ShHT Davlat rahbarlari kengashi majlisiga taqdim etish taklif etilmoqda.
Hukumat rahbarlari ShHT iqtisodiy tahlil markazlari konsorsiumi reglamentini ham tasdiqladi — ShHTga a’zo har bir mamlakatda bittadan shunday markaz tashkil etish ko‘zda tutilgan.
ShHT a’zolarining temiryo‘l ma’muriyatlari o‘rtasidagi o‘zaro munosabatlar konsepsiyasi va Transport tashuvlarini integratsiyalashgan boshqaruv tizimini shakllantirish to‘g‘risida ShHT hukumatlari o‘rtasida hadli shartnomani tayyorlash to‘g‘risidagi qaror tasdiqlandi. Ushbu hujjatdan ko‘zlangan maqsad — barcha turdagi transport vositalari bo‘yicha yagona munosabatlar tizimini ishlab chiqish.
Tashkilotga a’zo mamlakatlar bosh vazirlari ShHT shaharlarining ekologik farovonligini riovjlantirish dasturi va ShHT mamlakatlari o‘rtasida xizmatlar savdosi sohasida hamkorlik to‘g‘risidagi qarorni ham tasdiqladi.Kengash majlisi davomida ShHT kotibiyati va BMT Oziq-ovqat va qishloq xo‘jaligi tashkiloti (FAO) o‘rtasida axborot almashinuvi, shuningdek, hamkorlikda seminar va davra suhbatlari o‘tkazish bo‘yicha o‘zaro anglashuv memorandumi imzolandi.
Majlisda ShHT mamlakatlarining bojxona xizmatlari milliy tranzit tizimlarini o‘zaro integratsiya qilish to‘g‘risidagi memorandumni imzoladi. Hujjat “kelgusida hamkorlikni yanada chuqurlashtirish maqsadida” milliy tranzit tizimlari o‘rtasidagi o‘zaro munosabatlar va ularni intgratsiya qilish qoidalarini belgilab beradi.
Shuningdek, ushbu memorandum bojxona operatsiyalarini o‘tkazishni tezlashtirish va soddalashtirish, qog‘ozsiz texnologiyalarni tatbiq etish uchun sharoitlarni yaratish, milliy axborot tizimlarining faoliyat ko‘rsatish tamoyillarini bir shaklga keltirishga imkon beradi.
Umuman, ShHT Hukumat rahbarlari kengashi majlisi davomida 14 ta hujjat imzolandi, ushbu hujjatlardan 12 tasi bevosita bosh vazirlar tomonidan tasdiqlandi.
Izoh (0)