O‘zbekistonda 80 foiz jamoat transporti gaz hamda elektr dvigateliga o‘tkaziladi, deb xabar bermoqda O‘zA.
Bu haqda Adliya vazirligi tomonidan “2030-yilgacha bo‘lgan davrda O‘zbekiston Respublikasining atrof-muhitni muhofaza qilish konsepsiyasini tasdiqlash to‘g‘risida”gi Prezident farmoni bo‘yicha o‘tkazilgan matbuot anjumanida Davlat ekologiya qo‘mitasi axborot xizmati bosh mutaxassisi Sevara Davlatova ma’lum qilgan.
“Konsepsiyani amalga oshirish natijasida qator natijalarga erishamiz. Qurigan Orol dengizi o‘rnida daraxtlarni ekish ko‘rsatkichi 28 foizdan 60 foizga yetkaziladi, 80 foiz jamoat transporti gaz hamda elektr dvigateliga o‘tkaziladi, aholiga sanitar xizmatlar ko‘rsatish qamrovi 48 foizdan 100 foizga yetkaziladi, chiqindilarni qayta ishlab chiqarish bugungi kunda 18 foizni tashkil qilsa, konsepsiyada 60—65 foizga yetkazish belgilangan”, — degan u.
Shuningdek, farmonga ko‘ra, Davlat ekologiya qo‘mitasining yovvoyi hayvonlarni ovlashga va o‘simlik dunyosi obyektlaridan maxsus foydalanishga ruxsatnomalar berish bo‘yicha vakolatlari Qoraqalpog‘iston Respublikasi Ekologiya va atrof-muhitni muhofaza qilish qo‘mitasiga, viloyatlar va Toshkent shahar ekologiya va atrof-muhitni muhofaza qilish boshqarmalariga berildi.
Eslatib o‘tamiz, Prezidentning yuqoridagi farmoniga ko‘ra, O‘zbekistonda 1-noyabrdan daraxtlar kesilishiga moratoriy joriy etish taklifi ma’qullangandi. Moratoriy 2019-yil 1-noyabrdan 2020-yil 31-dekabrgacha amal qiladi.
Izoh (0)