Шанхай ҳамкорлик ташкилоти (ШҲТ)га аъзо мамлакатларнинг ҳукумат раҳбарлари янги, 2035 йилгача мўлжалланган кўп томонлама савдо-иқтисодий ҳамкорлик дастурини қабул қилди. «Gazeta.uz»нинг хабар беришича, ШҲТ Ҳукумат раҳбарлари кенгаши мажлиси 2 ноябрь куни Тошкентда бўлиб ўтди.
Дастурнинг аввалги, 2003 йилда кучга кирган таҳрири 2020 йилга қадар амалда бўлади. Дастурнинг янги талқинида асосий эътибор рақамлаштириш ва юксак технологияларга қаратилган.
Янги ҳужжат савдо ва инвестициялар, банк ва молиявий ҳамкорлик, транспорт ва логистика, саноат, қишлоқ хўжалиги, энергетика, божхона, инновациялар, ахборот технологиялари, ҳудудлараро муносабатлар, туризм, экология ва таълим соҳаларидаги устувор вазифаларни белгилаб беради.
Мавзуга доир: Беларусь ШҲТ доирасида ядровий хавфсизлик бўйича мунтазам учрашувлар ўтказишни таклиф қилди
Ушбу ҳужжатда, жумладан, чегараолди ҳудудларнинг ўзаро муносабатлари ҳақида ҳам сўз боради. Асосий эътибор рақамли технологиялар ва инновацион ишланмалардан фойдаланишга қаратилган. Концепцияни кўриб чиқиш учун 2020 йил 22—23 июль кунлари Санкт-Петербургда бўлиб ўтадиган ШҲТ Давлат раҳбарлари кенгаши мажлисига тақдим этиш таклиф этилмоқда.
Ҳукумат раҳбарлари ШҲТ иқтисодий таҳлил марказлари консорсиуми регламентини ҳам тасдиқлади — ШҲТга аъзо ҳар бир мамлакатда биттадан шундай марказ ташкил этиш кўзда тутилган.
ШҲТ аъзоларининг темирйўл маъмуриятлари ўртасидаги ўзаро муносабатлар концепцияси ва Транспорт ташувларини интеграциялашган бошқарув тизимини шакллантириш тўғрисида ШҲТ ҳукуматлари ўртасида ҳадли шартномани тайёрлаш тўғрисидаги қарор тасдиқланди. Ушбу ҳужжатдан кўзланган мақсад — барча турдаги транспорт воситалари бўйича ягона муносабатлар тизимини ишлаб чиқиш.
Ташкилотга аъзо мамлакатлар бош вазирлари ШҲТ шаҳарларининг экологик фаровонлигини риовжлантириш дастури ва ШҲТ мамлакатлари ўртасида хизматлар савдоси соҳасида ҳамкорлик тўғрисидаги қарорни ҳам тасдиқлади.Кенгаш мажлиси давомида ШҲТ котибияти ва БМТ Озиқ-овқат ва қишлоқ хўжалиги ташкилоти (ФАО) ўртасида ахборот алмашинуви, шунингдек, ҳамкорликда семинар ва давра суҳбатлари ўтказиш бўйича ўзаро англашув меморандуми имзоланди.
Мажлисда ШҲТ мамлакатларининг божхона хизматлари миллий транзит тизимларини ўзаро интеграция қилиш тўғрисидаги меморандумни имзолади. Ҳужжат «келгусида ҳамкорликни янада чуқурлаштириш мақсадида» миллий транзит тизимлари ўртасидаги ўзаро муносабатлар ва уларни интграция қилиш қоидаларини белгилаб беради.
Шунингдек, ушбу меморандум божхона операцияларини ўтказишни тезлаштириш ва соддалаштириш, қоғозсиз технологияларни татбиқ этиш учун шароитларни яратиш, миллий ахборот тизимларининг фаолият кўрсатиш тамойилларини бир шаклга келтиришга имкон беради.
Умуман, ШҲТ Ҳукумат раҳбарлари кенгаши мажлиси давомида 14 та ҳужжат имзоланди, ушбу ҳужжатлардан 12 таси бевосита бош вазирлар томонидан тасдиқланди.
Изоҳ (0)