Afg‘onistonning terrorchilikka qarshi kurash bo‘yicha taklifiga javoban Medvedev maxsus xizmatlarning ShHT doirasidagi hamkorligini kuchaytirish zarurligini ta’kidladi

Shanxay hamkorlik tashkiloti tashkilotning barcha a’zolari o‘rtasida mavjud hamkorlik va yakdil harakatlar asosida terrorchilikka qarshi kurash bo‘yicha mintaqaviy strategiyani ishlab chiqishi maqsadga muvofiqdir. Ushbu taklif ShHT Hukumat rahbarlari kengashining 2-noyabr kuni Toshkentda bo‘lib o‘tgan majlisida Afg‘oniston bosh vaziri Abdulla Abdulla tomonidan bildirildi (Afg‘oniston ShHTda kuzatuvchi maqomiga ega).

Abdulla Abdullaning qayd etishicha, Afg‘onistonning o‘zi ham samarali aksilterror strategiyasini ishlab chiqishga harakat qilmoqda. Shu nuqtai nazardan mintaqaviy miqyosda hamkorlikni yo‘lga qo‘yish taklifi terrorchilik va unga turdosh muammolarga qarshi birgalikda kurashish uchun ham zarurdir.

Bosh vazir Abdulla Abdulla Afg‘onistonda tinchlikka erishish yo‘lida Rossiya, AQSh, Yevropa Ittifoqi, O‘zbekiston va Xitoy tomonidan ko‘rsatilayotgan ko‘mak va qo‘llov uchun minnatdorlik bildirdi, deya xabar bermoqda “Gazeta.uz”.

Abdulla Abdullaning qayd etishicha, Afg‘oniston ShHTning qismlarini bog‘lab turuvchi muhim bir unsurdir, boisi u tashkilotga a’zo davlatlarning deyarli barchasi bilan chegaradosh. “Biroq, 2015 yildayoq ariza kiritganimizga qaramay, hali ham ShHTga to‘laqonli a’zo bo‘la olganimiz yo‘q”, — deya qo‘shimcha qildi u.

Rossiya bosh vaziri Dmitriy Medvedev ShHT mamlakatlariga Afg‘oniston iqtisodiyotini inqirozdan olib chiqish bo‘yicha aniq loyihalarni ishlab chiqishni taklif qildi.

“Afg‘on iqtisodiyotini inqirozdan olib chiqa oladigan, ushbu mamlakatning mintaqadagi siyosiy va iqtisodiy jarayonlar ishtirokchisiga aylantira oladigan aniq loyihalar haqida o‘ylash kerak”, — deya, Medvedev bu yo‘lda ShHT mamlakatlari bundan keyin sa’y-harakatlarni birlashtirishlari kerakligini ta’kidladi.

“Xalqaro terrorizm butun sivilizatsiyalashgan dunyoga tahdid solmoqda. Ekstremistik g‘oyalarga qarshi kurashish, terrorchilik mafkurasiga qarshi tura olmoq uchun — ayniqsa bu borada o‘ziga yarasha muammolarga ega mamlakatlarda — biz huquqni muhofaza qiluvchi organlar va maxsus xizmatlar yo‘nalishidagi yaqin hamkorlikni yanada mustahkamlashimiz zarur”, — deya qo‘shimcha qildi Dmitriy Medvedev.