O‘zMTDP Samarqand viloyati kengashi Madaniy meros obyektlarini inventarizatsiyadan o‘tkazish va ularning holati bilan yaqindan tanishish maqsadida joylarda o‘rganish o‘tkazdi.
O‘rganish davomida Samarqand shahridagi bir necha masjidning so‘nggi vaqtlarda qarovsiz holga kelib qolayotgani aniqlandi.
Masalan, XIX asrda bunyod etilgan shahardagi “Mulla Qalandar” masjidi shu yerda yashovchi aholining mablag‘i hisobidan bir necha yil muqaddam ta’mirdan chiqarilgan. Ma’nan eskirgan eshik va derazalar zamonaviylari bilan almashtirilgan. Masjidning ustunlari, devorlari va shifti bo‘yalgan kishi e’tiborini tortadigan ko‘rinish kasb etgan. Namozxonlar uchun qisman bo‘lsa-da sharoitlar yaratilgan.
Ammo bugun bu masjidda namoz o‘qilmaydi, undan mahalla ahli u-bu narsalarni saqlaydigan ombor sifatida foydalanib kelmoqda. Ushbu obyekt devorlarining poydevor qismi biroz zaxlagan. Bu holatni esa fuqarolar tabiat omillari ta’siri bilan izohlamoqda.
Samarqand shahar Abdurasulov ko‘chasida joylashgan XIX asrga tegishli bo‘lgan “Ko‘k masjid” majmuasi ham aholining va mutasaddi tashkilotlarning e’tiboridan ancha chetda qolgan. Natijada masjid ko‘rinishiga jiddiy putur yetib, ta’mirtalab holga kelib qolgan. Ustunlari va devorlari ancha yillardan buyon buyoq ko‘rmagan. Tom qismi va tarnovlari eskirib, yaroqsiz holga kelib qolgani bois yomg‘ir, qor suvlari masjid devorlarini yuvib o‘tadi. Oqibatda uning devorlari zaxlab g‘ishtlarning joyidan ko‘chish holatlari kuzatilmoqda. Bugun namoz o‘qilmaydigan ushbu masjid ham ancha xarob ahvolda, deyiladi xabarda.
Samarqand shahri Shoxruh ko‘chasida joylashgan “Yusuf Xarrot” masjidi taxminan XIX asrning oxirlarida XX asrning boshlarida barpo etilgan bo‘lib, madaniy meros obyektlari ro‘yxatiga kiritilgan.
“Afsuski, partiya ishchi guruhi ushbu obyektni o‘rganish uchun ko‘rsatilgan manzilga borganida vayronaning ustidan chiqdi. Masjiddan nom-nishon ham qolmagani har qanday kishini taajjubga solishi, tabiiy.
Mahalliy aholining ta’kidlashicha, ushbu masjid devorlari yomg‘ir va qor suvlari ta’sirida yillar davomida nurab, yiqilib tushgan. Bugun bu yerda qurilish chiqindilaridan boshqa narsani uchratmaysiz. Hududning tozaligi, ozodaligi ham ushbu manzaraga mos. Holi xarob bunday masjidlarni ko‘rib, nima deyishni ham bilmaysan kishi”, — deyiladi xabarda.
Izoh (0)