“Farzandi ko‘z oldida xo‘rlangan ayol” nomli sarlavha bilan fuqaro Sh.O.ning O‘zbekiston Prezidentiga yo‘llagan videomurojaati 26-oktabr kuni ijtimoiy tarmoqlarda tarqalgan edi. “Zarnews”ning xabar berishicha, mazkur holat Qashqadaryo viloyati ichki ishlar boshqarmasi tomonidan tezkor o‘rganilgan.
Unga ko‘ra, murojaat Yakkabog‘ tumani IIB navbatchilik qismida ro‘yxatdan o‘tkazilib, tergovga qadar tekshiruv harakatlari tuman IIB huquqbuzarliklar profilaktikasi bo‘limi inspektori tomonidan olib borilgan.
Aniqlanishicha, tergovga qadar tekshiruv harakatlari davomida fuqaro S.O. ko‘p miqdorda spirtli ichimlik iste’mol qilib, 25-iyun kunidan 26-iyun kuniga o‘tar kechasi o‘ta mast holatda bo‘lganligi sababli qo‘shnisi Sh.O.ning uyiga kirgan. O‘z navbatida, S.O.ni ko‘rgan ayol unga qarshilik ko‘rsatib, qo‘l ko‘targan. Shundan so‘ng S.O. ham ayolni bir necha marotaba urib, uydan qochib chiqib ketgan. Holat yuzasidan yig‘ilgan hujjatlar to‘plami orqali S.O. qo‘shni ayolning nomusiga tegish va uning mol-mulkini egallashga qaratilgan harakatlarni sodir qilmaganligi isbotlangan.
Fuqaro Sh.O. ham o‘zining dastlabki ko‘rsatmalarida S.O. uning nomusiga tegishga qaratilgan harakatlarni sodir qilmaganligini va faqatgina uning tanasini turli joylariga urib, so‘ng uydan qochib chiqib ketganligini bayon qilgan.
Holat yuzasidan tayinlangan sudga oid tibbiyot ekspertizasining xulosasida Sh.O.ning tanasidagi jarohatlar og‘irlik darajasiga ko‘ra, sog‘liqning qisqa muddat yomonlashuviga olib kelmagan, yengil tan shikasti guruhiga kirishi ko‘rsatilgan.
Tuman IIB xodimlari tomonidan holat yuzasidan jamlangan hujjatlar to‘plami Yakkabog‘ tumani prokurori va ma’muriy sudi tomonidan o‘rganib chiqilgandan so‘ng 2019-yil 30-sentabr kuni qo‘shimcha tergovga qadar tekshiruv harakatlarini o‘tkazish uchun Yakkabog‘ tumani IIBga yuborilgan.
Hozirda mazkur holat yuzasidan tergovga qadar tekshiruv harakatlari Yakkabog‘ tumani IIB profilaktika inspektori tomonidan olib borilmoqda.
Izoh (0)