Toshkentning Nukus ko‘chasida issiq suv quvuri yorilib ketgan, deya xabar bermoqda “Gazeta.uz”.
Voqea isitish mavsumiga tayyorgarlik doirasida o‘tkazilgan yakuniy opressovka vaqtida yuz bergan — quvur kuchli bosim ostida yorilib ketgan.
Shahar ma’muriyatining qo‘shimcha qilishicha, hodisa oqibatlarini bartaraf etish bo‘yicha choralar ko‘rilgan va ayni vaqtda ta’mirlash ishlari olib borilmoqda.
Qayd etish joiz, Nukus ko‘chasi ostidan o‘tgan quvurlar so‘nggi ikki yildan beri ta’mirlanadi.
O‘tgan yil sentabrida shunga o‘xshash hodisa Qatortolda bo‘lgandi — yo‘l ostidagi quvurlar yuqori bosimga bardosh bera olmay, tashqariga otilib chiqqan va kamida ikkita mashinaga zarar yetkazgan edi.
Keyinroq “Toshissiqquvvati” korxonasi hodisa oqibatida Spark va Matiz avtomobillari pachoq bo‘lgan har ikki fuqaroga jami 17,8 million so‘m kompensatsiya puli to‘lab bergani ma’lum bo‘lgan edi.
Izoh (0)