Oliy Majlis Qonunchilik palatasi deputati Rasul Kusherbayev oliy ta’lim tizimida joriy etilgan ayrim yangi tartiblarni qoraladi.
Joriy yil talaba yoshlar uchun haqiqiy sinov davri bo‘ldi. To‘lov kontrakt miqdorining va’dadan ko‘ra ko‘proq oshirilishi, stipendiyaning baholar kesimida emas, bir xil 400 ming so‘m miqdorida belgilanishi bo‘lajak ziyoli yoshlar o‘rtasida keskin norozilik keltirib chiqardi.Bu tabiiy. Yoshlarning e’tirozlari to‘liq asosga ega. Chunki ular nomardlik qilishmadi, ko‘plari yaxshi o‘qidi, izlandi, intildi, talabalik va’dasini bajardi.
Muhokamalar avjida payti normativ huquqiy hujjatlar loyihalari muhokamasi portaliga qo‘yilgan va shu yilning 23-sentabrdan 6-oktabrgacha muhokama etilgan “Oliy ta’lim muassasalari talabalariga stipendiya to‘lash tartibi va miqdorlari to‘g‘risida”gi Vazirlar Mahkamasi qarori loyihasi bo‘yicha hamon qaror qabul qilingani yo‘q. Nima uchun? Bu loyiha bo‘yicha deyarli barcha taklif va munosabatlar salbiy ekanligi bilan bog‘liqmi yoki shunchaki ma’lum vaqtgacha yoshlarning hovurini bosish uchun qilingan chalg‘ituvchi “manyovrmi”?
Shuncha e’tiroz, shuncha ovoz, shuncha savollarni ko‘rib turib tana boshqa dard bilmas, deganlaridek talabalikning bugungi qiyinchiliklarini boshidan o‘tkazmayotgan, o‘z davrida qulay sharoit, imtiyoz va kerak bo‘lsa kontrakt to‘lovisiz oliy ta’lim olib, bugun bu kabi qarorlarni ishlab chiqishda mutaxassis bo‘lib o‘tirgan kishilar uzoq viloyatdan yo‘lkirasiga arang pul topib o‘qiyotgan yoshning dardini qayoqdan ham bilsin, degan xulosa paydo bo‘lmoqda. Xuddi shunday: oliy ta’lim mas’ullari talabalikning “sovug‘ini yemagan”, yoshlarning dardini tushunmaydigan hissiz kishilar ekanligi kundan kun oydinlashmoqda. Yana bilmadim.
Non narxi oshgan shu kunlarda ayrim oliy o‘quv yurtlarida yaxshi o‘qib, yaxshi stipendiya olib yashagan talabalar endilikda 400 ming so‘m stipendiya yetmayotganligi bois, “tirikchilik” dardida dars qoldirib “nb”chilar safiga qo‘shilib borayotganini eshitib, asablar tarang bo‘lib bormoqda. Ertaga bu “nb” sabab uning talabalar safidan chiqmasligiga, “nb”ni yopish uchun domlaga topganini qistirmasligiga, eshikma-eshik sarg‘ayib bilimsiz kadr bo‘lmasligiga kim kafolat beradi? Innovatsion g‘oyalar, takliflar bisyor bir vaqtda nahotki “domlalar”ning ahvolini yaxshilashning bundan boshqa yo‘li yo‘q.
Nima bo‘lganda ham kelajak egalari — yoshlar oldida insofsizlik, adolatsizlik, befarqlik va notenglikning yaqqol ko‘rinishi bo‘ldi bu.
Bir haqiqatni unutmaylik: toki shuncha e’tiroz va dardini aytgan yoshlarning dardiga quloq tutmas ekanmiz, ulardan vatanparvarlikni talab qilib, yaxshi o‘qishga, yurt kelajagi uchun vijdonan mehnat qiladigan kadr bo‘lishga da’vat qilishga ham haqimiz yo‘q. Buni yoddan chiqarmaylik.
Parlament va masalaga befarq bo‘lmagan barcha darajadagi xalq vakillari deputatlar, faollar esa oliy ta’lim mas’ullarining bu ishlarini yuqori darajada muhokama qilishi, mantiqsiz va noto‘g‘ri qaror qabul qilinishiga sabab bo‘lganlarning harakatlariga xalq nomidan munosib baho berishi shart.
Mening bahoim esa “ikki”!
Rasul Kusherbayev, Oliy Majlis Qonunchilik palatasi deputati
Izoh (0)