Sirdaryoda mikroavtobus haydovchilari bilan yuzaga kelgan muammo bo‘yicha Transport vazirligi matbuot xizmati rasmiy bayonot berdi.
O‘zbekistonda yo‘l harakati barcha ishtirokchilarining xavfsizligini ta’minlash, avtomobil transportida yo‘lovchilarni tashishda yo‘l-transport hodisalariga yo‘l qo‘ymaslik maqsadida 2019-yil 21-may kuni Vazirlar Mahkamasining “Yo‘lovchilarni avtobusda tashish xavfsizligini ta’minlashga doir qo‘shimcha chora-tadbirlar to‘g‘risida”gi qarori qabul qilingan
Mazkur qarorning 1-bandiga muvofiq, 2019-yil 1-sentabrdan boshlab foydalanish muddati 15 yildan ortiq bo‘lgan avtobuslarda yo‘lovchilarni tashishga litsenziya kartochkalari berilishiga yo‘l qo‘yilmasligi hamda 2021-yil 1-yanvardan boshlab foydalanish muddati 15 yildan ortiq bo‘lgan avtobuslarda yo‘lovchilarni tashish taqiqlanganligi belgilangan.
Ushbu qarordan so‘ng ayrim transport uyushmalari va ularga a’zo haydovchilar o‘rtasida endi foydalanish muddati 15 yildan oshgan mikroavtobuslarga ham litsenziya berish to‘xtatiladi degan noto‘g‘ri fikr yuzaga kelgan. Ana shunday holat Sirdaryo viloyatida kuzatilgan.
Vazirlik bayonotida aytilishicha, viloyat transport boshqarmasi rahbariyati tomonidan ushbu qaror mazmun-mohiyati transport uyushmalari rahbarlariga to‘liq tushuntirilmaganligi qolaversa, litsenziya berish jarayonida ortiqcha sansolarlikka yo‘l qo‘yilishi mikroavtobus haydovchilarining haqli e’tirozlarini keltirib chiqardi.
Ushbu holat yuzasidan Transport vazirligining avtomobil va daryo transportini rivojlantirish departamenti va yuridik boshqarmasi vakillaridan iborat maxsus ishchi guruh 5-oktabr kuni Sirdaryo viloyati transport boshqarmasida yo‘lovchi tashuvlari sohasida faoliyat yuritib kelayotgan uyushma rahbarlari va haydovchilar bilan sayyor qabul o‘tkazgan.
Qabul davomida ishtirokchilarga qarorning mazmun-mohiyati atroflicha tushuntirilib, qatnashchilarni qiziqtirgan savollarga mutaxassislar tomonidan batafsil javob berilgan. Haydovchilar bilan bo‘lib o‘tgan ochiq muloqotda ular litsenziya varaqalari olish uchun o‘zi a’zo bo‘lgan uyushmalar orqali hududiy transport boshqarmasiga belgilangan tartibda ariza bilan murojaat etmagani aniqlangan.
Ishchi guruh tomonidan barcha haydovchilarga litsenziya olish tartib qoidalari yana bir bor batafsil tushuntirilib, viloyat transport boshqarmasiga kelib tushgan arizalar bo‘yicha o‘z muddatida litsenziya varaqalarini taqdim etish bo‘yicha ko‘rsatma berilgan.
Uchrashuv davomida Sirdaryo viloyati transport boshqarmasi rahbari Oybek Erbekov haydovchilardan ularning ish faoliyati davomida yuzaga kelgan noqulayliklar uchun uzr so‘rab, bu kabi holat boshqa takrorlanmasligini ta’kidlagan.
Sayyor qabul davomida belgilangan vazifalar ijrosini nazorat qilish maqsadida 19-oktabr, shanba kuni maxsus ishchi guruh Sirdaryo viloyatiga tashrif buyurib, yo‘lovchi tashuvlari sohasida faoliyat yuritib kelayotgan uyushma rahbarlari va haydovchilar bilan yana bir bor uchrashuv o‘tkazganda Transport uyushmalari rahbarlari bilan bo‘lib o‘tgan muloqot davomida ularga litsenziya varaqalari to‘liq ravishda berilganligi ma’lum bo‘lgan.
Izoh (0)