Ukrainaning “Ukrprominvest-Agro” kompaniyasi O‘zbekistonga Amerika seleksiyasining golshteyn-friz zotli 97 bosh sigiridan iborat birinchi partiyani olib keldi, deb xabar bermoqda kompaniya matbuot xizmati.
“U bugungi kunda dunyodagi eng sermahsul sut beruvchi sigir zotidir. Sigirlarni ko‘paytirish uchun genetik material ishlab chiqarishda dunyo yetakchilari — World Wide Series va Alta Genetics bilan hamkorlik qilamiz va Interbull reytingiga ko‘ra dunyodagi eng yaxshi 100 talikka kirgan buqalarning zamonaviy genetik materialidan foydalanamiz”, — degan chorvachilik bo‘yicha direktor Maksim Armashov.
Uning so‘zlariga ko‘ra, hozirda sigirlarni O‘zbekistonga doimiy eksport qilish bo‘yicha muzokaralar davom etmoqda.
O‘zbekistonning Ukrainadan sigirlarni eksport qilishi Qozog‘istonning chorva mollarni olib chiqishni taqiqlagani sharoitida amalga oshmoqda.
Iyun oyida Qozog‘iston mamlakatdan yirik qoramol olib ketilishini taqiqlashga qaror qilgandi. Bunga ularning O‘zbekistonga katta miqdorda yetkazilgani sabab bo‘lgan. Avgust oyiga kelib Qozog‘iston O‘zbekistonga yirik shoxli chorva sotishni taqiqlash rejasidan qisman voz kechdi.
Oktabr oyiga kelib esa Qozog‘iston qishloq xo‘jaligi vaziri va moliya vazirining qo‘shma qaroriga ko‘ra, mamlakat hududidan sigirlarni olib chiqish taqiqlandi. Taqiq olti oyga joriy etiladi hamda yirik shoxli qoramol, xususan, bir yoshgacha bo‘lgan urg‘ochi buzoqlar, bir yoshdan oshgan sigirlar, qo‘y, echki va echki bolalariga tegishli.
Izoh (0)