Олий Мажлис Қонунчилик палатаси депутати Расул Кушербаев олий таълим тизимида жорий этилган айрим янги тартибларни қоралади.
Жорий йил талаба ёшлар учун ҳақиқий синов даври бўлди. Тўлов контракт миқдорининг ваъдадан кўра кўпроқ оширилиши, стипендиянинг баҳолар кесимида эмас, бир хил 400 минг сўм миқдорида белгиланиши бўлажак зиёли ёшлар ўртасида кескин норозилик келтириб чиқарди.Бу табиий. Ёшларнинг эътирозлари тўлиқ асосга эга. Чунки улар номардлик қилишмади, кўплари яхши ўқиди, изланди, интилди, талабалик ваъдасини бажарди.
Муҳокамалар авжида пайти норматив ҳуқуқий ҳужжатлар лойиҳалари муҳокамаси порталига қўйилган ва шу йилнинг 23 сентябрдан 6 октябргача муҳокама этилган «Олий таълим муассасалари талабаларига стипендия тўлаш тартиби ва миқдорлари тўғрисида»ги Вазирлар Маҳкамаси қарори лойиҳаси бўйича ҳамон қарор қабул қилингани йўқ. Нима учун? Бу лойиҳа бўйича деярли барча таклиф ва муносабатлар салбий эканлиги билан боғлиқми ёки шунчаки маълум вақтгача ёшларнинг ҳовурини босиш учун қилинган чалғитувчи «манёврми»?
Шунча эътироз, шунча овоз, шунча саволларни кўриб туриб тана бошқа дард билмас, деганларидек талабаликнинг бугунги қийинчиликларини бошидан ўтказмаётган, ўз даврида қулай шароит, имтиёз ва керак бўлса контракт тўловисиз олий таълим олиб, бугун бу каби қарорларни ишлаб чиқишда мутахассис бўлиб ўтирган кишилар узоқ вилоятдан йўлкирасига аранг пул топиб ўқиётган ёшнинг дардини қаёқдан ҳам билсин, деган хулоса пайдо бўлмоқда. Худди шундай: олий таълим масъуллари талабаликнинг «совуғини емаган», ёшларнинг дардини тушунмайдиган ҳиссиз кишилар эканлиги кундан кун ойдинлашмоқда. Яна билмадим.
Нон нархи ошган шу кунларда айрим олий ўқув юртларида яхши ўқиб, яхши стипендия олиб яшаган талабалар эндиликда 400 минг сўм стипендия етмаётганлиги боис, «тирикчилик» дардида дарс қолдириб «нб»чилар сафига қўшилиб бораётганини эшитиб, асаблар таранг бўлиб бормоқда. Эртага бу «нб» сабаб унинг талабалар сафидан чиқмаслигига, «нб»ни ёпиш учун домлага топганини қистирмаслигига, эшикма-эшик сарғайиб билимсиз кадр бўлмаслигига ким кафолат беради? Инновацион ғоялар, таклифлар бисёр бир вақтда наҳотки «домлалар»нинг аҳволини яхшилашнинг бундан бошқа йўли йўқ.
Нима бўлганда ҳам келажак эгалари — ёшлар олдида инсофсизлик, адолатсизлик, бефарқлик ва нотенгликнинг яққол кўриниши бўлди бу.
Бир ҳақиқатни унутмайлик: токи шунча эътироз ва дардини айтган ёшларнинг дардига қулоқ тутмас эканмиз, улардан ватанпарварликни талаб қилиб, яхши ўқишга, юрт келажаги учун виждонан меҳнат қиладиган кадр бўлишга даъват қилишга ҳам ҳақимиз йўқ. Буни ёддан чиқармайлик.
Парламент ва масалага бефарқ бўлмаган барча даражадаги халқ вакиллари депутатлар, фаоллар эса олий таълим масъулларининг бу ишларини юқори даражада муҳокама қилиши, мантиқсиз ва нотўғри қарор қабул қилинишига сабаб бўлганларнинг ҳаракатларига халқ номидан муносиб баҳо бериши шарт.
Менинг баҳоим эса «икки»!
Расул Кушербаев, Олий Мажлис Қонунчилик палатаси депутати
Изоҳ (0)