Ijtimoiy tarmoqlarda Xo‘jayli tumani Xalq ta’limi bo‘limiga qarashli umumiy o‘rta ta’lim maktablari o‘qituvchilari 17-oktabrdan paxta terimiga majburan chiqarilgani haqida xabarlar tarqaldi. Qoraqalpog‘iston Respublikasi Xalq ta’limi vazirligi tomonidan vaziyat o‘rganib chiqildi.
Mazkur holat joriy yilning 19-oktabr, shanba kuni Xo‘jayli tumani prokuraturasi va tuman bandlikka ko‘maklashish markazi mutaxassislari ishtirokida o‘rganilgan bo‘lib, o‘rganish jarayonida tuman hokimining o‘rinbosari Q.Seytmuratov, tuman Xalq ta’limi bo‘limi boshlig‘i K.Fayzullayeva hamda bo‘limga qarashli mavjud 42 ta umumiy o‘rta ta’lim maktabi direktorlaridan batafsil tushuntirish xatlari olingan. Umumta’lim maktablari direktorlari o‘z tushuntirish xatlarida biror-bir shaxs ularni paxta terimiga yoki boshqa turdagi majburiy mehnatga jalb qilmaganligini bayon qilgan.
Shuningdek, tuman Xalq ta’limi bo‘limi boshlig‘i K.Fayzullayeva o‘z tushuntirish xatida umumiy o‘rta ta’lim maktablarining 2213 nafar o‘qituvchisi tomonidan belgilangan dars soatlari muntazam ravishda uzluksiz o‘tib kelinayotganligini, haftaning shanba va yakshanba kunlari umumta’lim maktablarining texnik xodimlari ixtiyoriy ravishda, qo‘shimcha daromad topish maqsadida O‘zbekiston Respublikasi Vazirlar Mahkamasining 9-sentabrdagi “2019-yil paxta hosilini yig‘ib-terib olish ishlarini uyushqoqlik bilan o‘tkazish chora-tadbirlari to‘g‘risida”gi 752-sonli qaroriga asosan tuman Bandlikka ko‘maklashish markazi bilan tuzilgan shartnoma asosida chiqayotganligini bayon qildi.
Mazkur holat yuzasidan Xo‘jayli tumani hokimining o‘rinbosari Q.Seytmuratov bilan gaplashilganda u tumanda yoshlar siyosati, ijtimoiy rivojlantirish va ma’naviy-ma’rifiy ishlarga mas’ul ekanligini bildirdi va joriy yil paxta mavsumi avvalgi yillardan farq qilib, majburiy emasligini, aksincha, ixtiyoriy qo‘shimcha daromad topishga qaratilganligi bilan ajralib turishi haqida tuman hokimligining rasmiy Telegram, Instagram va boshqa ijtimoiy tarmoqlari orqali e’lon berganligini, biroq 2019-yilning 17-oktabr kunida hech qanday yig‘ilish o‘tkazmaganligini bildirdi.
Shuningdek, o‘rganish jarayonida Xo‘jayli tumani hokimligi tomonidan ommaviy paxta terimi mavsumi boshlanganligi, joriy yilgi paxta mavsumi avvalgi yillardan farqli bo‘lib, eng asosiysi majburiy emasligi, aksincha, ixtiyoriy qo‘shimcha daromad topishga qaratilganligi bilan ajralib turishi hamda hukumat qarori bilan belgilangan imtiyozlar, budjet tashkilotlari, ta’lim muassasalari, maktabgacha ta’lim muassasalari, tibbiyot xodimlari, voyaga yetmaganlar va o‘z roziligi bo‘lmagan barcha fuqarolarni paxta terimiga jalb etish qonun doirasida qat’iy taqiqlanganligi haqida 9-sentabr kuni qator saytlar hamda tuman hokimligining rasmiy Telegram, Instagram va boshqa ijtimoiy tarmoqlari orqali e’lon berilganligi aniqlandi.
O‘rganish natijasida joriy yilning 19-oktabr kuni tumandagi umumiy o‘rta ta’lim maktablari o‘qituvchilarining bir guruhi 17-oktabrdan majburiy tarzda paxta terimiga chiqarilayotganligi haqida ijtimoiy tarmoqlarda chop etilgan maqola asossiz ekanligi aniqlandi va o‘z tasdig‘ini topmadi.
“Mazkur holat Qoraqalpog‘iston Respublikasi Xalq ta’limi vazirligi tomonidan alohida nazoratga olinib, Xo‘jayli tumani umumta’lim maktablari rahbarlariga yana bir marotaba respublikada fuqarolarning mehnat huquqi kafolatlanganligi, har qanday shakldagi majburiy mehnatdan foydalanish, biron-bir jazo qo‘llash bilan qo‘rqitgan holda ishlarni bajarishga majburlashni taqiqlovchi normativ-huquqiy hujjatlar ijrosi qat’iy nazoratga olinganligi tushuntirildi”, — deyiladi xabarda.
Izoh (0)