Eron tashqi ishlar vaziri Saudiya Arabistoni bilan nizolarni hal etish uchun Ar-Riyodga boradi

Eron tashqi ishlar vazir Muhammad Javod Zarif vaziyat shuni taqozo etsa Saudiya Arabistoni bilan nizolarni hal etish maqsadida Ar-Riyodga safar qilishini ma’lum qildi, deya xabar berdi “Iran.ru”.

Eron hududdagi keskin vaziyatni pasaytirish yuzasidan har qanday tashabbusni qo‘llab-quvvatlaydi va biz Yamandagi urushni to‘xtatishda har qanday yo‘nalishda hamkorlik qilishga tayyormiz.

Eron har doim yaman xalqiga ko‘mak berib kelgan va biz urushning to‘xtatilishi Yamanga har tomonlama foyda bo‘lishiga ishonamiz.

Muhammad Javod Zarif, Eron tashqi ishlar vaziri

Saudiya Arabistoni va vassal mamlakatlar koalitsiyasi 2015-yil martida avval Ar-Riyod homiyligi ostida hukmronlik qilgan Mansur Hadiy boshqaruvini tiklash hamda xusiylarning “Ansarullo” harakatini yo‘q qilish maqsadida Yamanda urush boshlagan.

G‘arb davlatlarining qo‘llab-quvvatlashi ostida amalga oshirilgan harbiy zo‘ravonliklar va harbiy-dengiz blokadasi Yaman infratuzilmasini vayron qilib ijtimoiy inqirozga olib keldi.

14-sentabrda Yaman isyonchi xusiylari Saudiya Arabistonining ikkita neft zavodiga dronlar hujumini uyushtirdi va bu “Saudi Aramco” kompaniyasining neft ishlab chiqarish hajmining kamayishiga, jahon bozorida neft narxining keskin oshishiga sabab bo‘ldi.

Yaman isyonchi xusiylari ushbu harakat uchun mas’uliyatni o‘z zimmasiga olib bu Saudiyaga mamlakatda urush boshlagani uchun o‘ziga xos javob ekanligini bildirdi. Ammo Ar-Riyod hamda Vashington xusiylarning ushbu operatsiyasiga Eron homiylik qilganini ma’lum qildi. AQSh va Saudiya Arabistonining ushbu fikriga Fransiya, Germaniya va Buyuk Britaniya ham qo‘shildi. Eron ushbu ayblovlarni inkor etdi.