Эрон ташқи ишлар вазир Муҳаммад Жавод Зариф вазият шуни тақозо этса Саудия Арабистони билан низоларни ҳал этиш мақсадида Ар-Риёдга сафар қилишини маълум қилди, дея хабар берди «Iran.ru».
Эрон ҳудуддаги кескин вазиятни пасайтириш юзасидан ҳар қандай ташаббусни қўллаб-қувватлайди ва биз Ямандаги урушни тўхтатишда ҳар қандай йўналишда ҳамкорлик қилишга тайёрмиз.У Покистон бош вазири Имрон Хон билан Ямандаги вазият тез-тез муҳокама қилинаётганини айтган ва Эроннинг Ямандаги урушни тўхтатиш учун ҳар қандай чораларга тайёрлигига яна урғу берган.Эрон ҳар доим яман халқига кўмак бериб келган ва биз урушнинг тўхтатилиши Яманга ҳар томонлама фойда бўлишига ишонамиз.
Муҳаммад Жавод Зариф, Эрон ташқи ишлар вазири
Саудия Арабистони ва вассал мамлакатлар коалицияси 2015 йил мартида аввал Ар-Риёд ҳомийлиги остида ҳукмронлик қилган Мансур Ҳадий бошқарувини тиклаш ҳамда хусийларнинг «Ансарулло» ҳаракатини йўқ қилиш мақсадида Яманда уруш бошлаган.
Ғарб давлатларининг қўллаб-қувватлаши остида амалга оширилган ҳарбий зўравонликлар ва ҳарбий-денгиз блокадаси Яман инфратузилмасини вайрон қилиб ижтимоий инқирозга олиб келди.
14 сентябрда Яман исёнчи хусийлари Саудия Арабистонининг иккита нефть заводига дронлар ҳужумини уюштирди ва бу «Saudi Aramco» компаниясининг нефть ишлаб чиқариш ҳажмининг камайишига, жаҳон бозорида нефть нархининг кескин ошишига сабаб бўлди.
Яман исёнчи хусийлари ушбу ҳаракат учун масъулиятни ўз зиммасига олиб бу Саудияга мамлакатда уруш бошлагани учун ўзига хос жавоб эканлигини билдирди. Аммо Ар-Риёд ҳамда Вашингтон хусийларнинг ушбу операциясига Эрон ҳомийлик қилганини маълум қилди. АҚШ ва Саудия Арабистонининг ушбу фикрига Франция, Германия ва Буюк Британия ҳам қўшилди. Эрон ушбу айбловларни инкор этди.
Кейинчалик Саудия Арабистони ҳамда Эрон ўртасидаги муносабатлар «Sabiti» нефть танкерининг Жидда портига яқин ҳудудда ҳужумга учраши натижасида янада кескинлашди. Теҳрон ҳужум ортида АҚШ, Исроил ва Саудия Арабистони тургани, бу борадаги аниқ далил-исботлар БМТ хавфсизлик кенгашига юборилишини маълум қилди.
Изоҳ (0)