Andijon shahrida 19-oktabr kuni Open Andijan birinchi xalqaro investitsiya forumi o‘tkazildi. Unda farmatsevtika, avtosanoat, qishloq xo‘jaligi mahsulotlarini qayta ishlash, yengil sanoat yo‘nalishlari bo‘yicha jami 250 million dollar miqdoridagi investitsion loyihalarini amalga oshirish bo‘yicha kelishuv shartnomalari imzolandi. Bu haqda “Daryo” muxbiri Umidjon Mamarasulov xabar bermoqda.
Tashqi ishlar vazirligi, Investitsiya va tashqi savdo vazirligi hamda Savdo-sanoat palatasi hamkorligida o‘tkazilgan forumda 30 ga yaqin mamlakatdan 500 dan ortiq tadbirkor va investorlar ishtirok etdi. Forumda 100 ga yaqin tadbirkorni birlashtirgan Hindistonning Gujarat shtati bosh vaziri Vijay Rupani boshchiligidagi delegatsiya a’zolari faollik ko‘rsatdi.
Forumning rasmiy ochilish marosimi Andijon shahridagi Yoshlar markazida bo‘lib o‘tdi. Unda viloyatning qishloq xo‘jaligi mahsulotlarini ishlab chiqarish va qayta ishlash, turizm, avtomobilsozlik, farmatsevtika, to‘qimachilik sanoati sohalaridagi yutuq va loyihalarni amalga oshirish uchun mavjud imkoniyatlar to‘g‘risida taqdimot qilindi.
Savdo-sanoat palatasi binosida tashkil etilgan ko‘rgazmada esa ishtirokchilarga “O‘zavtosanoat”, “Andijansilko”, “Sabo”, “Hamkor”, “Neil Granite”, “Makrofarm” kabi eksport kompaniyalari mahsulotlari namoyish etildi. Aynan shu yerda xorijiy investorlar, xalqaro moliya institutlari vakillari va viloyat tadbirkorlari ishtirokida investitsion loyihalar yuzasidan fikr almashildi. Muzokaralar yakunlari bo‘yicha shu kunning o‘zida G2B va B2B formatida aniq kelishuv va shartnomalar imzolandi.
Shuningdek, forum davomida Hindistonning Cadila Pharmaceuticals Limited kompaniyasi bilan 2019-yildan 2022-0yilgacha Andijon farmatsevtika zonasida 50 million dollar miqdoridagi to‘g‘ridan-to‘g‘ri xorijiy investitsiyalar bilan integratsiyalashgan farmatsevtika ishlab chiqarishni bosqichma-bosqich amalga oshirish to‘g‘risida bitim imzolandi.
Forum doirasida Belarusning Grodno va Mogilyov viloyatlari bilan ham savdo-iqtisodiy, ilmiy, texnologik va madaniy-gumanitar sohalarda hamkorlik to‘g‘risidagi bitimlarni amalga oshirish bo‘yicha yo‘l xaritalari tasdiqlandi.
Forum yakuni bo‘yicha savdo-sanoat palatasida xorijiy va ommaviy axborot vositalari, blogerlar uchun viloyat hokimi Shuhratbek Abdurahmonov ishtirokida matbuot anjumani ham tashkil etildi.
“Bugungi forum davomida samarali natijalarga erishdik. Ayni paytgacha farmatsevtika, avtosanoat, qishloq xo‘jaligi mahsulotlarini qayta ishlash, yengil sanoat kabi 17 yo‘nalish bo‘yicha jami 250 million dollar miqdoridagi investitsion loyihalarini amalga oshirish bo‘yicha kelishuv shartnomalari imzolandi. Agarda loyihalar ishga tushirilsa, o‘rtacha besh yoki olti ming nafar andijonlikning bandligi ta’minlanadi. Bundan tashqari hozirda to‘g‘ridan-to‘g‘ri investitsiya kiritish istagini bildirayotgan hamkorlarimiz soni ham tobora ortib bormoqda. O‘ylaymanki, biz o‘z maqsadimizga erishayapmiz”, — dedi Shuhratbek Abdurahmonov.
Forum davomida Andijon shahridagi Jome majmuasida mehmonlar uchun qishloq xo‘jaligi hamda hunarmandlik mahsulotlari ko‘rgazmasi tashkil etildi.
Izoh (0)