Uchqo‘rg‘on tuman ma’muriy sudi tomonidan o‘tkazilgan sayyor sud majlisida tibbiyot xodimlarini haqoratlab, bemorlar tinchini buzgan shaxslarga nisbatan ma’muriy ishlar ko‘rib chiqildi. Bu haqda “Daryo”ga sud raisi Ozodjon Ziyovuddinov ma’lum qildi.
U.Bobomurod 2019-yil 2-sentabr kuni soat 16:30 atrofida spirtli ichimlik ichgani sababli yiqilib, qo‘lini sindirib oladi. Shundan so‘ng Norin tuman markaziy shifoxonasiga borib, rentgenga tushish uchun navbatda turganida hech bir sababsiz xizmat vazifasini bajarayotgan vrachlarni so‘kib, baqir-chaqir qiladi. Avvaliga uni tinchlantirishga urinishadi. Mastligi sabab buning imkoni bo‘lmagach, shifoxona mutasaddilari tuman IIBga murojaat qiladi.
Ichki ishlar xodimlari kelganidan keyingina U.Bobomurod hovuridan tushadi. Unga nisbatan ma’muriy bayonnoma rasmiylashtirilib, to‘plangan hujjatlar sudga yuboriladi.
Sudda jabrlanuvchi Ya.Razzoqov markaziy shifoxonada rentgenolog bo‘lib ishlashi, 2-sentabr kuni bemorlarni qabul qilayotganida navbatga turgan U.Bobomurod uni va boshqa vrach-hamshiralarni haqoratlagani haqida ko‘rsatma beradi.
Uchqo‘rg‘on tuman ma’muriy sudi U.Bobomurodni Ma’muriy javobgarlik to‘g‘risidagi kodeksning 183-moddasida ko‘rsatilgan huquqbuzarlikni sodir etgan deb topib, 5 sutka ma’muriy qamoq jazosi tayinladi.
2019-yil 17-sentabr kuni M.Xurshid ham mast holatda yiqilib tushib, qo‘li lat yeydi va soat 17:00 atrofida Norin tuman markaziy shifoxonasida boradi. Bu yerda shifokorlarni haqoratlab, bemorlar tinchini buzadi.
Navbatchi shifokor uni o‘zini tutib olishga chaqirganida, aksincha, battar avjiga chiqadi. Shundan so‘ng huquq-tartibot idoralariga murojaat qilishga to‘g‘ri keladi. Ichki ishlar xodimlari tomonidan unga nisbatan tegishli tartibda ma’muriy bayonnoma rasmiylashtiriladi.
Uchqo‘rg‘on tuman ma’muriy sudi tomonidan ushbu ish ko‘rib chiqilib, M.Xurshid Ma’muriy javobgarlik to‘g‘risidagi kodeksning 183-moddasida ko‘rsatilgan huquqbuzarlikni sodir etgan deb topildi. Unga nisbatan 7 sutka ma’muriy qamoq jazosi tayinlanadi.
Izoh (0)