“Qandim” majmuasida gazni qayta ishlovchi zavod to‘liq qurib bitkazilgani va tegishli infrastruktura yaratilishi munosabati bilan davlat qabul komissiyasi dalolatnomasini imzolash marosimi bo‘lib o‘tdi.
Korxonaning ma’muriy binosida o‘tkazilgan ushbu marosimda davlat va jamoat tashkilotlari vakillari, zavod ishchi-muhandislari va ommaviy axborot vositalari vakillari ishtirok etdi.
“Qandim” gazni qayta ishlash majmuasi qurilishi 2016-yil aprel oyida boshlangan va bu gaz kondensati koni Rossiyaning “Lukoyl” neft kompaniyasi bilan hamkorlikda “Qandim—Xauzak—Shodi—Qo‘ng‘irot” mahsulot taqsimoti bitimi doirasida bunyod etilgan.
5 gektar hududni qamrab olgan majmua Qorako‘l tumanining olis cho‘l hududida joylashgan. Unda 500 kilometr texnologik va quvur tarmoqlari, 285 kilometr avtomobil yo‘li, 50 kilometrli temir yo‘l, 268 kilometrli elektr ta’minoti tizimlari, 71 ta quduq, 220 kilometr bo‘lgan yig‘uv tizimi inshootlari, 70 kilometrga teng eksport quvuri, 55 kilometr uzunlikdagi suv ta’minoti tizimlari barpo etilgan.
“Lukoyl Uzbekistan Opereyting Kompani” MChJ tomonidan har birining tabiiy gazni yillik qayta ishlash quvvati 4,05 milliard kubometrga teng bo‘lgan 2 ta texnologik tizimdan iborat gazni qayta ishlash zavodi, ta’mirlash hududlari va zavod qoshidagi boshqa obyektlar, shuningdek, 1150 kishiga mo‘ljallangan turar joy binolari to‘liq ishga tushirilib, Davlat qabul komissiyasiga topshirilgan.
— “Qandim konlar guruhida gazni qayta ishlash majmuasi qurilishi va ishga tushirilishi” investitsiya loyihasi to‘liq qurib bitkazildi. Uning ishlab chiqarish quvvati yiliga 8 milliard metr kub tabiiy gazni qayta ishlashga mo‘ljallangan. Umumiy investitsiya hajmi esa 3,5 milliard dollarga teng. Majmua tozalangan tabiiy yoqilg‘i, barqaror gaz kondensati hamda qumoqlangan va granulyatsiyalangan oltingugurtni ishlab chiqarish uchun tarkibida serovodorod mavjud bo‘lgan gazni qayta ishlashga imkon yaratadi. Respublikadagi gazni qayta ishlash sohasida eng oxirgi ishga tushirilgan mazkur zavodda zamonaviy texnologiya va zamonaviy boshqaruv tizimlari joriy etilgan, — deydi “O‘zbekneftgaz” aksiyadorlik jamiyati departament boshlig‘i Alisher Bahodirov “Daryo”ga bergan intervyusida.
Davlat qabul komissiyasi dalolatnomasi imzolangunga qadar har bir jihat ishchi komissiya tomonidan chuqur ko‘rib chiqilgan. Taklif, tavsiyalar va e’tirozlar yuzasidan amallar to‘liq bajarilgan. Majmuadagi har bir ishchi-xodimning xavfsizligi va mehnat muhofazasi yuqori darajada ta’minlangani o‘rganilgan. Maxsus kiyim-bosh, shaxsiy va jamoaviy himoya vositalari ko‘zdan kechirilgan.
Shuningdek, xonalarning shinamligi, yorug‘ligi, havoning aylanish tezligi, xodimlarning ishlashida ularning salomatligiga ta’sir o‘tkazishi mumkin bo‘lgan holatlargacha o‘rganib chiqilgan. Ishchi komissiyaning yakuniy xulosasiga ko‘ra, majmuaning har bir jihati davlat standartlari darajasiga javob bergandan keyingina tayyor, deb hisoblangan va Davlat komissiyasi tomonidan qabul qilingan.
Davlat qabul komissiyasi tarkibiga Energetika, Bandlik va mehnat munosabatlari, Favqulodda vaziyatlar, Qurilish vazirliklari, “O‘zbekneftgaz” AJ, Davlat energetika nazorati, Sanoat xavfsizligi bo‘yicha davlat qo‘mitasi, “O‘zdavneftgazinspeksiya”, yong‘in xavfsizligi bosh boshqarmasi, Ekologiya va atrof-muhitni muhofaza qilish davlat qo‘mitasi, kasaba uyushmalari tashkilotlari, Buxoro viloyat hokimligi va boshqa davlat tashkilotlari vakillari kiritilgan.
Ma’lumot o‘rnida, to‘la quvvat bilan ishlayotgan majmuadan 212 ming tonna sof oltingugurt, 134 ming tonna barqarorlashtirilgan gaz kondensati olinadi, tozalangan tabiiy gaz eksportga yo‘naltiriladi.
Izoh (0)