Hindistonda qabristondan tiriklayin ko‘milgan chaqaloq topildi (foto)

Hindistondagi qabristonlarning birida xumga solib tiriklayin dafn qilingan chaqaloq topib olindi. Bu haqda The Sun xabar berdi.

Chaqaloqni boshqa o‘lik tug‘ilgan bolaga qabr qazimoqchi bo‘lgan go‘rkovlar topib olgan. Farzandidan judo bo‘lgan oila ham qabristonda yer ostidan go‘dak chinqirig‘ini eshitgan.

“Nahot qizim qayta tirilgan bo‘lsa deb o‘ylab qoldim, aslida bu ovoz boshqa qabrdagi xumdan chiqqan ekan”, — deydi voqea guvohi bo‘lgan Hitesh Kumar.

Go‘rkovlar xumni qazib olgach u yerda tirik yotgan chaqaloqni topgan. Shundan so‘ng voqea joyiga politsiya va tez yordam xodimlari chaqirilgan.

Qizaloq shifoxonaga yetkazilgan va u yerda chaqaloqning o‘pkasida infeksiya borligi aniqlangan. Ayni vaqtda qizaloq ovqatni og‘zi orqali iste’mol qila olmaydi. Chaqaloqni topib olgan oila uni asrab olishga qaror qilgan.

Nashrning qayd etishicha, qizchaning haqiqiy ota-onasi Hindistonda o‘g‘il farzand qizdan ustun hisoblangani uchun ham tiriklayin yerga ko‘mgan bo‘lishi mumkin.