Davlatga xiyonatda ayblangan va 10 yilga ozodlikdan mahrum qilingan Xitoy bo‘yicha mutaxassis Konstantin Siroyejkin Qozog‘iston fuqaroligidan ham mahrum bo‘ldi. U ozodlikka chiqqanidan keyin mamlakat tashqarisida hayot kechiradi. Bu haqda Olmaota sudi axborot xizmati ma’lumoti asosida “RIA Novosti” xabar bergan.
Avval Qozog‘iston xavfsizlik xizmati 2019-yil boshida hibsga olingan Siroyejkinning Olmaota tumanlararo maxsus sudi qaroriga ko‘ra davlatga xiyonat qilgani uchun 10 yilga ozodlikdan mahrum qilinganini bildirgan.
“Sud uni Qozog‘iston Respublikasi fuqaroligidan ham mahrum qildi”, — deyilgan shahar sudining axborot xizmati xabarida.
Ayblanuvchi jazoni ijro etishning kuchaytirilgan tartibli muassasasida o‘taydi. “Konstantin Siroyejkin jazo muddatini o‘tab bo‘lganidan so‘ng, u davlat hududini tark etadi va ushbu shaxsning mamlakat hududiga kirishiga 5 yilgacha ruxsat berilmaydi”, — deyiladi sud bergan ma’lumotda.
63 yoshli Siroyejkin hibsga olinguniga qadar Qozog‘iston prezidenti huzuridagi Strategik tadqiqotlar institutida qariyb 13 yil ishlagan. U rus, ingliz va xitoy tillarida chop etilgan ko‘plab kitoblar va maqolalar muallifi hisoblanadi.
Izoh (0)