14-oktabr kuni Barselonada 2017-yilda o‘tkazilgan mintaqa mustaqilligi to‘g‘risidagi referendum tashkilotchilariga nisbatan qamoq jazosi qo‘llanilishiga qarshi ommaviy namoyishlar boshlandi, deb xabar beradi Meduza.
Namoyishlar butun Barselona bo‘ylab, jumladan, shaharning markaziy Via Layetana ko‘chasida ham kuzatilmoqda.
Namoyishchilar qamalgan siyosatchilar ozod qilinishini talab qilib shaharning to‘rtta asosiy ko‘chasidagi harakatni to‘xtatib qo‘ygan.
Barselonadan 100 kilometr uzoqlikda joylashgan Jironda odamlar shaharlararo va Fransiyaga boradigan poyezdlar harakatini to‘xtatib qo‘ygan.
Kataloniyalik siyosatchilar qamoq jazosiga hukm qilinganidan so‘ng “Demokratik sunami” tashkiloti o‘zining 150 ming nafar tarafdorlarini Barselona markazidan 15 kilometr uzoqlikda joylashgan El-Prat aeroporti ishini to‘xtatishga chorladi.
“Butun dunyo bo‘ylab bizning ovozimizni eshitishlari kerak bo‘lgan payt keldi. Maqsad — Barselona aeroporti ishini to‘xtatish”, —deyiladi tashkilot xabarida.
Minglab namoyishchilar Barselona aeroporti bo‘ylab yurib, avtomagistrallardagi harakatni to‘xtatib qo‘ydi. Shuningdek, ular ma’lum muddatga metro va temir yo‘llar harakatini ham to‘xtatib qo‘ygan.
O‘sha kuni boshqa davlatlarga uchishi kerak bo‘lgan odamlar aeroportga piyoda borishga majbur bo‘ldi.
Aeroport yaqinida sakkiz mingga yaqin odam to‘plandi. Ispaniya politsiyasi qarata dubinka va rezina o‘qlardan foydalanib namoyishchilarni tarqata boshladi.
Qayd etilishicha, shifokorlar kun davomida Barselonada asosan aeroportda 56 nafar jabrlanuvchiga tibbiy yordam ko‘rsatgan.
Barselona aeroportida kamida 20 ta reys bekor qilingan. Bundan tashqari, “Demokratik sunami” tashkiloti 1200 ga yaqin avtomobil Madrid—Baraxas aeroportiga kirishni to‘sib qo‘ygan.
Izoh (0)