Tojikiston prezidenti Emomali Rahmon respublika sanoat korxonalari vakillari bilan yig‘ilishda Rog‘un GESining qurilishiga qancha mablag‘ sarflanganini aytib o‘tdi. Bu haqda “Sputnik” xabar berdi.
Tojikiston prezidenti sanoat korxonalari vakillari bilan o‘tkazilgan yig‘ilishda mamlakatning ulkan gidroenergetika resurslariga ega ekanligini alohida ta’kidlagan.
Shuningdek, Emomali Rahmon o‘z nutqida mustaqillik yillarida 1900 megavatt quvvatga ega yangi sanoat korxonalari qurilgani, 1100 kilometr uzunlikdagi elektro‘tkazgich liniyalari barpo etilgani, 500 kilovolt quvvatga ega 4 ta podstansiya, 220 kilovolt quvvatli 10 ta elektrostansiya va boshqa obyektlar ishga tushirilib, Tojikistonning yagona energetik tizimi shakllanganligini qayd etgan.
Uning so‘zlariga ko‘ra, sohani rivojlantirish uchun mustaqillik yillarida umumiy qiymati 23 milliard somoniyni tashkil etuvchi 25 ta loyiha amalga oshirilgan. Ayni vaqtda mamlakat hukumati ko‘magi bilan jami 6 milliard somoniy sarflangan 9 ta loyiha amalga oshirilmoqda.
Tojikiston prezidenti Rog‘un GESining barpo etilishiga qurilish boshlanganidan beri davlat budjeti hisobidan 24 milliard somoniy sarflanganini ma’lum qildi.
Shuningdek, u mamlakatda yangi energetika obyektlarini qurish va foydalanishga topshirish bilan bir qatorda ishlab turganlarini qayta tiklash va ta’mirlash ishlari ham amalga oshirilayotganini bildirdi.
“Ushbu chora-tadbirlar ichki korxonalar faoliyatini yo‘lga qo‘ygan holda milliy iqtisodiyotni va mamlakat aholisini elektr bilan ta’minlash imkonini beradi. Ishlab chiqarish sektorini elektrsiz rivojlantirib bo‘lmaydi”, — deya ta’kidlagan Emomali Rahmon.
Rahmon kelajakda elektr energiyadan samarali foydalanish hamda ushbu jarayonga zamonaviy texnologiyalarni jalb qilish birlamchi ahamiyatga ega ekanligini bildirdi.
Izoh (0)