Farg‘onalik paxtakorlar mamlakatda birinchi bo‘lib, joriy yilgi paxta topshirish shartnomaviy rejani bajardi. Bu haqda O‘zA xabar berdi.
Fermer xo‘jaliklari tomonidan mo‘l hosil yetishtirilib, 238 ming 600 tonnadan ortiq paxta xirmoni bunyod etildi, uning aksariyat qismi yuqori navlarga sotildi. O‘tgan yili birgina Rishton tumanida, joriy yilda esa viloyatning 9 ta tumanida paxta-to‘qimachilik klasterlari tashkil etildi.
Viloyatdagi 2 ming 149 ta fermer xo‘jaliklari 82 ming 80 gektar maydonga chigit ekdi. G‘o‘zani navlar bo‘yicha joylashtirishda avvalo hududlarning tuproq-iqlim sharoiti, suv ta’minoti hamda sohaning yetakchi olim va mutaxassislari, fermer xo‘jaliklari rahbarlari, shuningdek, klaster korxonalari takliflari inobatga olindi. G‘o‘zaning “S-8290”, “Namangan-77”, “Sulton”, “S-6524” navlari ekilib, agrotexnik tadbirlarga muhim e’tibor qaratildi. 6 ming 980 gektar maydonda yangi navlar sinovdan o‘tkazildi.
Innovatsion usul sug‘orish tizimida ham sinovdan o‘tkazildi. 331 gektar maydonda tomchilatib, tuproq sharoiti suvni ko‘p sarf qilinadigan maydonlarda 176 komplekt egiluvchan quvurlar orqali sug‘orish joriy etildi. Viloyatda g‘o‘za parvarishida uning rivojini tezlashtirish va hosildorlikni 3-5 sentnerga oshirish maqsadida biologik faol moddalar-biostimulyatorlar qo‘llandi.
Klaster korxonalari tomonidan moddiy-texnik bazani mustahkamlash masalasi asosiy vazifa sifatida belgilandi. Joriy yilning o‘zida umumiy qiymati 50 milliard so‘mdan ortiq bo‘lgan 40 dona haydov traktori, 100 dona chopiq traktori, 80 dona transport traktori, 120 dona chigit ekish seyalkasi, 90 dona kultivator, 300 dona omoch, 85 dona purkagich, 35 dona mineral o‘g‘it sepish moslamalari olib kelinib, agrotexnik tadbirlarni o‘z vaqtida amalga oshirilishiga erishildi.
Viloyatning Yozyovon, Qo‘shtepa, Rishton tumanlari 15 ish kunida davlatga paxta sotish shartnomaviy rejasini respublikada birinchi bo‘lib bajardi. Shuningdek, Toshloq, Furqat, Uchko‘prik, Buvayda tumanlari ham paxta xirmoniga munosib hissa qo‘shdi. Bugun boshqa tumanlar ham astoydil harakat qilmoqda.
Viloyat bo‘yicha 2019-yilda paxta xomashyosi yetishtirish va terib olish uchun 877 milliard 225 million so‘mdan ortiq mablag‘ sarflandi. Yetishtirilgan paxtadan fermer xo‘jaliklari kesimida olingan aniq hisob-kitoblarga asosan 340 milliard so‘m foyda olinishi kutilmoqda.
Farg‘onaliklar mavsum yakuniga qadar hosildorlikni 34-35 sentnerga yetkazishni rejalashtirgan.
Izoh (0)