22-sentabr kuni Andijon tumanida yashovchi A.Yu.ga tegishli bo‘lgan Damas rusumli avtomashina oynasining tusini o‘zgartirishga berilgan ruxsatnomasi soxta ekanligi aniqlandi.
Andijon viloyati IIB matbuot xizmatining “Daryo”ga xabar berishicha, ushbu holat bo‘yicha to‘plangan hujjatlar huquqiy baho berishlik uchun Andijon viloyati IIB huzuridagi Tergov boshqarmasiga yuborildi va O‘zbekiston Respublikasi JKning 228-moddasi bilan jinoyat ishi qo‘zg‘atildi.
Tergov harakatlari davomida Asaka tumani Dasturxonchi MFYda yashovchi X.R.ning nomiga rasmiylashtirilgan Captiva rusumli hamda Andijon shahrida joylashgan “OOO Fito Farm” MChJga tegishli Nexia-3 rusumli avtomashinalar uchun rasmiylashtirilgan avtotransport vositasi oynalarining tusini o‘zgartirishga ruxsat berilganligi to‘g‘risidagi hujjatlar qalbakiligi aniqlandi. Surishtiruvda soxta hujjatlar Andijon shahrida yashovchi I.Yu. orqali tayyorlanganligi ma’lum bo‘ldi.
Tergov harakatlari davomida I.Yu. ushbu qalbaki ruxsatnomalarni tanishi Xo‘jaobod tumanida yashovchi N.A. orqali tayyorlaganligini bildirdi. Profilaktik suhbat jarayonida N.A. o‘zining yonida bo‘lgan 5 dona qalbaki ruxsatnomani taqdim etdi. N.A. qalbaki ruxsatnomalarni Andijon shahrida yashovchi Sh.A, tomonidan uning yashash xonadonida tayyorlatganligini ma’lum qildi.
IIV o‘z xavfsizligi boshqarmasi Andijon viloyati bo‘yicha bo‘limi hamda Andijon shahar ichki ishlar organlari faoliyatini muvofiqlashtirish boshqarmasi huzuridagi tergov bo‘limi xodimlari hamkorligida Andijon shahri Paxtakor MFY Chinobod ko‘chasida joylashgan 10-uy 16-xonadon xolislar ishtirokida tintuv qilinganida bu joydan hujjatlarni qalbakilashtirish uchun foydalanib kelinayotgan kompyuter jamlanmalari, qalbakilashtirilgan haydovchilik guvohnomalari, ogohlantirish talonlari, avtomashinalar oynalarini tusini o‘zgartirishga ruxsatnomalar blankalari, o‘ndan ortiq fuqarolarning biometrik pasportlari , yana o‘ndan ortiq transport vositalarini qayd etish guvohnomalari hamda ishga aloqador boshqa ashyolar olindi. Sh.A, bilan olib borilgan profilaktik suhbatda shu kungacha 30 dan ortiq qalbaki ruxsatnomalarni tayyorlaganligini bayon qildi.
Hozirda yuqoridagi holatlar bo‘yicha Andijon shahar ichki ishlar organlari faoliyatini muvofiqlashtirish boshqarmasi huzuridagi Tergov bo‘limi tomonidan dastlabki tergov harakatlari olib borilmoqda.
Izoh (0)